Lajme nga vendi
Në Maqedoninë e Veriut festa e parë për 28 Nëntorin këtë vit filloi në Haraçinë!
Festat e nëntorit janë të një rëndësie të veçantë për shqiptarët, sepse shënojnë data historike kombëtare. E për këtë arsye edhe shqiptarët përgjatë këtij muaji nuk qëndrojnë pasiv e të heshtur, por janë të aktivizuar si asnjë muaj tjetër brenda vitit. Koordinim e bashkëpunim i gjithanshëm, vetëm për të sjellë atmosferë festive e krenarie për atë që jemi shqiptarë. Në Maqedoninë e Veriut festa e pavarësisë së Shqipërisë ka filluar shumë më herët, Komuna e Haraçinës njihet historikisht për rezistencën dhe kontributin e dhënë në çështjen e ngritjes së vetëdijes kombëtare kurdo që ka qenë nevoja. Prandaj, në këtë nëntor vepruan ashtu si u shkon përshtati para objektit të Komunës kishin vendosur flamurin kuq e zi për të valëvitur dhe dëshmuar se ka shqiptarë që e duan dhe e respektojnë kombin e tyre. Nën organizimin e gazetares së guximshme, Emira Selimi, në bashkëpunim me Komunën e Haraçinës është mbajtur ngjarje publike me të ftuarin special, gazetarin e atdhetarin nga Shqipëria, Marin Mema, për të shënuar 28 Nëntorin ndryshe këtë vit prej viteve tjera, shkruan Zhurnal.
Si festohet 28 Nëntori në Maqedoninë e Veriut?
Kur flasim për festa që janë të një rëndësie të veçantë, sigurisht që edhe kremtimi i tyre bëhet në të njëjtën formë, me një kujdes të shtuar e përkushtim maksimal. Festa e 28 Nëntorit, pavarësisë së Shqipërisë, për herë të parë në Maqedoninë e Veriut u shënua dhe u festua si e tillë në Komunën e Haraçinës, me të ftuarin special, Marin Mema, gazetarin që po gjurmon gjithçka që është shqiptare të mbetet e tillë.
Përndryshe, festa e 28 Nëntorit në Maqedoninë e Veriut shënohet edhe nga disa institucionet publike me të cilat edhe udhëheqin shumë shqiptarë, por këto ngjarje më shumë ngjajnë si ceremoni simbolike, e të njëjta sikurse viteve të kaluara, me figura partiake e një audiencë të selektuar. Ajo që u festua në Haraçinë ishte ndryshe sepse ishte e hapur publike për të marrë pjesë secili qytetarë që ndihej shqiptarë.
Prandaj, lirshëm mund të konstatojmë që festa e 28 Nëntorit në Maqedoninë e Veriut fillimin e kishte në Haraçinë, kurse pastaj të tjerat organizime janë vazhdimësi. Në këtë organizim kishte të pranishëm pjesëmarrës të gjithanshëm, por ajo që ra në sy ishte interesimi dhe pjesëmarrja masive e studentëve që vërshuan gazetarin nga Shqipëria, Marin Mema me pyetje të njëpasnjëshme, dhe kjo ishte pikërisht ajka e këtij organizimi që dëshmoi se zëri i të rinjve triumfon çdoherë kur përballë tyre kanë njerëzit e duhur e shumë të nevojshëm, kontribuues të pakompromist për çështjen shqiptare.
Organizatore e kësaj ngjarje ishte, Emira Selimi, gazetare e guximshme, e etur për studime prandaj edhe aktualisht është studente në Shkenca Politike, mbi të gjitha shembull për të rinjtë se si duhet kombi e vendi. Përndryshe, Selimi vjen nga Haraçina, dhe nga atje dha një mesazh të fuqishëm pikërisht në prag të festës së 28 Nëntorit, që do ta luftojë me gjithë qenien e saj përmes profesionit të saj, dukurinë më famkeqe e shkatërruese të kombit shqiptarë, asimilimin, dhe do ta ruajë me fanatizëm shqiptarinë nga tjetërsimi.
Në këtë ngjarje përpos që u tha shumë për çështjen shqiptare, rëndësinë e kësaj feste, poashtu u thanë fjalë të mëdha për Haraçinën, kryetarin e ri të Komunës, Ridvan Ibrahimin, për të cilën të gjithë folësit deklaruan se me të vërtetë ndryshe po frymon kjo Komunë, dhe se ndryshimi është vërejtur për një kohë shumë të shkurtë prej kur në krye të Komunës është zgjedhur të jetë, Ridvan Ibrahmi.
Kjo mbase u vërejt edhe në shënimin e kësaj feste që u mbajt në një format tjetër, me të ftuar eminent e meritor për të festuar së bashku, që në ballë të Komunës flamuri kuq e zi, ndërkaq e gjithë Haraçina ishte zbukuruar në dy anët me flamuj që ishin simbole feste e mikpritjeje të një shqiptari me emër e vepër, Marin Mema.
Shqiptarët diskriminohen edhe në ditë festash-
Përderisa, 8 prilli është përcaktuar si ditë ndërkombëtare e romëve dhe si e tillë festohet në RMV, 23 maji dita nacionale e vllehëve, e 28 shtatori si dita ndërkombëtare e boshnjakëve, 28 Nëntori është ditë e zakonshme pune për të gjithë qytetarët e RMV-së, pa çka se është dita e pavarësisë së Shqipërisë dhe se në Maqedoninë e Veriut populli shqiptarë është popull shtetformues kjo nuk e ndryshon aspak këtë qasje.
Përse shqiptarët nuk kërkojnë që 28 Nëntori të jetë ditë feste në Maqedoninë e Veriut?
Nuk ka shqiptarë që me të vërtetë është shqiptarë dhe jeton si i tillë që festën e 28 Nëntorit nuk do të kishte dashur ta ketë festë shtetërore dhe ditë pushimi që të ndjejë e festojë sipas traditës. Por, në RMV situata është ndryshe që të zgjedhurit e popullit jo çdoherë zgjedhin atë që ka nevojë dhe e dëshiron populli, kjo pasi për pasojë bie ndesh me palën tjetër. Politikanët shqiptarë përgjatë periudhës sa janë në pushtet asnjëherë nuk e ngrisin si çështje faktin që edhe në ditë festash diskriminohen shqiptarët.
Ministria e Punës dhe politikës sociale, ka vendosur që për shqiptarët të jetë vetëm një ditë feste ajo e 22 Nëntorit që ndryshe është Dita e Alfabetit të Gjuhës Shqipe, kjo krijon dilema pse pikërisht këtë ditë dhe pse jo edhe 28 Nëntori?. Mbase, mund të jetë fakti që edhe pse e përcaktojnë Ditën e Alfabetit si ditë feste ata e dinë dhe janë të kënaqur që statusi i gjuhës shqipe po vazhdon të jetë në gjendje të mjerueshme, me fjalë të tjera të festojnë shqiptarët për mjerimin në të cilin e kanë gjuhën e tyre.
Defaktorizimi i spektrit politik shqiptarë krijon hapësirë për diskriminime të natyrave të ndryshme-
Populli shqiptarë në Maqedoninë e Veriut “përfaqësohet” nga pesë parti politike, numër shumë i madh që ndikon në mënyrë të drejtpërdrejtë në përçarjen e votës shqiptare dhe defaktorizimin që pastaj si rrjedhojë sjellë mungesën e të drejtave elementare, kur flasim për zbatimin e gjuhës shqipe, si dhe festimin e festave mbarë kombëtare.
Ndryshe, festën e 22 Nëntorit shqiptarët e festojnë duke kujtuar që gjuha e tyre është e “përdhosur” dhe “sakatuar”, që ligjërisht figuron si gjuha e dytë zyrtare në Maqedoninë e Veriut, në Kushtetutë definohet me përqindje, në përdorim është e anashkaluar.
Megjithatë, për dallim prej festës së 22 Nëntorit, shqiptarët në këtë vend festën e 28 Nëntorit apo ndryshe Ditën e Flamurit mund ta festojnë vetëm pasi të përfundojnë orarin e punës aty ku janë të angazhuar, pasi nuk ka ditë pushimi në këtë ditë feste. Pra, për shqiptarët e Maqedonisë së Veriut dita e pavarësisë së Shqipërisë është ditë e zakonshme pune, sikurse ditët tjera, e kjo krejt fal defaktorizimit të politikbërësve shqiptarë si dhe mos interesimit të Shqipërisë. /Zhurnal.mk
Lajme nga vendi
Komuna e Tetovës: Nxënësit do të kthehen në mësim pas kontrollit për alarme të rreme për bombë
Nëse pas kontrollit, konfirmohet se ka një alarm të rremë për vendosjen e një bombe, nxënësit do të duhet të kthehen në mësime, thekso në konferencën për shtyp Nazmi Dauti, nga Departamenti i Marrëdhënieve me Publikun i Komunës së Tetovës. Ky rekomandim vjen pas dy ditësh kërcënimesh të alarme për bomba, pas të cilave mësimi u pezullua në shkollat fillore dhe të mesme të Tetovës.
Nga Komuna e Tetovës informoi se ka kërkuar nga policia që të rrisë praninë e saj para shkollave, si dhe të ketë një hetim të shpejtë dhe transparent për të identifikuar personat të cilët qëndrojnë pas alarmeve të rreme, bashkëpunim me drejtorët e shkollave, informacion zyrtar të menjëhershëm dhe të rregullt, si dhe informim të publikut për masat që po merren.
“Kur ka alarm për bombë në çdo shkollë fillore ose të mesme, nxënësit dhe mësuesit, përfshirë profesorët në shkollat e mesme, nuk duhet të largohen nga shkolla për të shkuar në shtëpi. Në vend të kësaj, përfaqësues të Ministrisë së Punëve të Brendshme do t’i evakuojnë ata nga objekti shkollor në hapësirat e jashtme dhe nxënësit, së bashku me mësimdhënësit dhe profesorët, do të duhet të presin udhëzime nga themeluesi, domethënë Komuna e Tetovës. Gjithashtu dhe nga ana e përfaqësuesve të Sektorit të Punëve të Brendshme do t’u kërkohet nëse mësimi do të vazhdojë apo do të pezullohet atë ditë. Siç e shohim këto dy ditë, fëmijët nuk po kthehen në shkollë dhe nuk ka nevojë për panik”, deklaroi në konferencë për shtyp Nazmi Dauti.
Ai tha se janë në komunikim të vazhdueshëm me Sektorin e Punëve të Brendshme, me drejtorët, si dhe me të gjitha institucionet e tjera përkatëse, por se për momentin nuk kanë një përgjigje se kush qëndron pas alarmeve të rreme dhe nëse është iniciuar ndonjë procedurë.
“Përgjegjësia jonë si komunë, si sektor i çështjeve publike, është t’i raportojmë ato si rast. Por, mënyra se si veprojnë është kompetenca e tyre dhe ne nuk kemi informacion, kështu që nuk kemi mundësi t’i pyesim dhe t’ju pyesim se si veproni ju, sepse dihet që kjo është komptetencë e MPB-së. Jemi dakorduar me Sektorin e Punëve të Brendshme që ne, si komunë, do të paraqesim një kërkesë dhe ata do të na japin një përgjigje nëse mësimi mund të vazhdojë apo duhet të pezullohet. Për pjesën tjetër, ato janë veprimet e tyre, procedurat e tyre graduale”, tha Dauti.
Sipas Dautit, sot në ndrrimin e pasditës do të vazhdojë procesi arsimor.
Lajme nga vendi
Iseni: Dhuna në ndeshjen Vardar–Bashkimi do të ndëshkohet, sporti s’duhet të kthehet në urrejtje
Zëvendësministri i Punëve të Brendshme, Astrit Iseni, ka reaguar pas incidenteve të ndodhura gjatë dhe pas ndeshjes së futbollit mes FK Vardar dhe KF Bashkimi, duke theksuar se çdo shkelje e ligjit do të marrë përgjigjen e merituar institucionale.
Në reagimin e tij, Iseni bëri të ditur se Ministria e Punëve të Brendshme ka ndjekur me vëmendje të gjitha zhvillimet dhe se policia ka vepruar sipas procedurave për të garantuar rendin dhe sigurinë e tifozëve, lojtarëve dhe stafit.
“Dhuna, ofendimet dhe sjelljet që nxisin tensione nuk i ndihmojnë as sportit, as shoqërisë sonë. Ekipet tona kanë qenë në terren dhe kanë vepruar në përputhje me ligjin,” deklaroi Iseni.
Ai theksoi se aktualisht janë duke u verifikuar të gjitha incidentet, ndërsa çdo moment i regjistruar po shqyrtohet me kujdes. “Kushdo që ka shkelur ligjin do të përballet me përgjegjësitë që parasheh ligji. Këtë e them me bindje të plotë,” u shpreh zëvendësministri.
Iseni apeloi që sporti të mos përdoret për të nxitur përçarje apo urrejtje, duke nënvizuar se futbolli duhet të mbetet emocion dhe pasion në frymën e fair-play-it. Ai bëri të ditur se MPB është në komunikim të vazhdueshëm me Federata e Futbollit e Maqedonisë dhe klubet për të siguruar zhvillimin e ndeshjeve në kushte të sigurta.
Në fund, Iseni u bëri thirrje të gjithë tifozëve që ta respektojnë sportin dhe njëri-tjetrin, duke garantuar se institucionet do të veprojnë me profesionalizëm të plotë. (INA)
Lajme nga vendi
Rasti Grubi, BDI akuzon ministrin Filkov për presion ndaj gjyqtarëve dhe prokurorëve
Bashkimi Demokratik për Integrim shpreh pakënaqësi të thellë dhe proteston drejtpërdrejt ndaj kërcënimeve të drejtuara ndaj gjyqtarëve dhe prokurorëve nga ministri Filkov në paraqitjen e tij të fundit publike.
“Pushteti ekzekutiv jo vetëm që nuk ka të drejtë kushtetuese të sugjerojë mënyrën e veprimit të organeve të drejtësisë, por roli i Ministrisë së Drejtësisë është pikërisht mbrojtja e integritetit dhe pavarësisë së pushtetit gjyqësor, veçanërisht në raste të ndjeshme kur polarizimi politik ushtron presion të madh mbi individët brenda sistemit të drejtësisë.
Ministri i Drejtësisë, në vend që ta mbrojë sistemin gjyqësor nga histeria partiake, po e nxit atë më tej, duke krijuar klimë të një vendimi të parapërcaktuar dhe duke adresuar publikisht mesazhe që përbëjnë presion ndaj prokurorëve dhe gjyqtarëve. Deklarata të tilla përbëjnë ndërhyrje të drejtpërdrejtë në një proces në zhvillim dhe, përveçse cenojnë parimin e ndarjes së pushteteve, përfaqësojnë goditje serioze ndaj sistemit të drejtësisë dhe rrezikojnë integritetin e procedurës.
I bëjmë thirrje ministrit që të përmbahet nga çdo ndërhyrje e mëtejshme publike në këtë çështje, ndërsa Ministria e Drejtësisë, përmes komunikimeve të qarta dhe të përgjegjshme, duhet të garantojë dhe të mbrojë pavarësinë dhe paanshmërinë e sistemit gjyqësor. Nëse kjo praktikë vazhdon, ministri duhet të shkarkohet menjëherë, me qëllim mbrojtjen e pavarësisë së pushtetit gjyqësor në këtë moment të ndjeshëm.
Bashkimi Demokratik për Integrim do të vazhdojë të ndjekë me kujdes dhe të evidentojë çdo veprim apo sjellje që krijon klimë linçimi dhe pengon vendimmarrjen e pavarur dhe të paanshme të organeve të drejtësisë. Për këto zhvillime do të informohen edhe partnerët tanë strategjikë – Shtetet e Bashkuara të Amerikës, Bashkimi Evropian dhe Misioni i OSBE-së në Shkup”, thuhet në reagimin e BDI-së.(INA)
Komuna e Tetovës: Nxënësit do të kthehen në mësim pas kontrollit për alarme të rreme për bombë
Iseni: Dhuna në ndeshjen Vardar–Bashkimi do të ndëshkohet, sporti s’duhet të kthehet në urrejtje
Rasti Grubi, BDI akuzon ministrin Filkov për presion ndaj gjyqtarëve dhe prokurorëve
Zyra e Avokatit të Popullit në Tetovë sot do të jetë e hapur
Nesër në Maqedoni do të shpallet gjendje krize në energjetikë, nga 1 shtatori hyjnë në fuqi masat për kursim
Kovaçevski paralajmëroi drejtor të ri të Drejtorisë për Zbatimin e Sanksioneve
Visar Ganiu ua uron Kurban Bajramin: Ju uroj që kjo festë e shenjtë t’ju sjellë paqe në zemër | VIDEO
Aksident tragjik në autostradën Tetovë – Gostivar, humb jetën një grua 33 vjeçare | VIDEO
