Koordinatori Nacional për Komunikim dhe Media në Qeverinë e Republikës së Maqedonisë së Veriut, Latif Arifi, ka njoftuar se zv kryeministri Arben Fetai është emëruar në krye të Këshillit Nacional për Hetime Financiare dhe Konfiskim të Pasurisë, duke e cilësuar këtë vendim si një moment kyç në forcimin e luftës kundër korrupsionit.

Sipas Arifit, emërimi i Fetait, si shqiptari i parë në këtë pozitë, shënon një kthesë të rëndësishme institucionale, pasi vendos në qendër hetimin financiar dhe konfiskimin e pasurisë së përfituar në mënyrë të paligjshme.

Ai ka theksuar se ky është një mesazh i qartë se shteti po synon rrënjët e korrupsionit, duke goditur drejtpërdrejt pasurinë dhe interesat e të paprekshmëve.

“Në një sistem ku korrupsioni është mbrojtur me heshtje dhe pushteti është përdorur si mburojë për të paprekshmit, sot po tentohet një çarje e rrezikshme për ata që janë mësuar të mos japin llogari.
Mbledhja konstituive e Këshillit Nacional për Hetime Financiare dhe Konfiskim të Pasurisë nuk është ceremonial, por paralajmërim se goditja po shkon te pasuria dhe rrënjët e korrupsionit. Arben Fetai , shqiptari i parë në krye, po vendos një vijë ndarëse mes kompromisit dhe integritetit, mes fasadës dhe transparencës. IA VLEN”, ka shkruar Latifi.

Studentët që dëshirojnë të ushtrojnë të drejtën e tyre për ushqim të subvencionuar studentor për vitin akademik 2025/2026 kanë ende disa ditë për të aplikuar, ka njoftuar Ministria e Arsimit dhe Shkencës (MASH). Afati i fundit për dorëzimin e aplikimeve skadon më 5 shkurt 2026.

“E drejta për ushqim të subvencionuar studentor është e destinuar për studentët e studimeve të plota universitare me të ardhura mujore më të ulëta se paga minimale neto, si dhe për studentët e regjistruar në studime pasuniversitare dhe të integruara në universitetet shtetërore dhe private në vend”, thonë nga MASH.

MASH thekson se studentët që plotësojnë kushtet dhe ende nuk kanë aplikuar mund të dorëzojnë një aplikim elektronikisht përmes portalit https://e-uslugi.mon.gov.mk.

“Për mbështetje shtesë gjatë aplikimit, studentët mund të kontaktojnë në adresën e email-it subvencioniran.obrok@mon.gov.mk. Në të njëjtën kohë, studentët, të cilëve u është ndërprerë më parë e drejta për ushqim të subvencionuar, mund të aplikojnë përsëri, nëse konsiderojnë se i plotësojnë kushtet e përcaktuara, si dhe ata që nuk kanë aplikuar në afatet e mëparshme aktive”, thonë nga MASH.

Shtohet numri i rasteve të fëmijëve dhe të miturve që kërkojnë ndihmë për shkak të komplikimeve shëndetësore nga konsumimi i pijeve energjike, njoftojnë nga Reparti i Ndihmës së Shpejtë.

Mjeku Sejfullah Ademi, tregon se përballet çdo ditë me raste të tilla dhe kërkon sensibilizim më të madh të shoqërisë, që jeta e fëmijëve të mos vihet në rrezik.

“Fatkeqësisht, edhe ne si Ndihmë e Shpejtë ballafaqohemi me raste të këtilla, ku shohim që fëmijët konsumojnë në mënyrë të pakontrolluar pije energjetike. Pijet e tilla energjetike nuk janë aspak të preferuara për fëmijët, duke pasur parasysh problemet që mund të ndodhin me takikardinë, gjë që, nëse nuk reagohet në mënyrë adekuate, e vendos në rrezik edhe vetë jetën e fëmijës. Ne, si Ndihmë e Shpejtë, kemi thirrje të tilla dhe dalim në mënyrë sa më të shpejtë të mundshme në teren, që t’iu afrojmë ndihmën fëmijëve të tillë, por të bëjmë apel pasi komplikimet mund të bëhen të rënda dhe fatkeqësisht të përfundojnë letalisht edhe për fëmijën.” – tha Sejfullah Ademi, mjek i Ndihmës së Shpëjtë.

Ademi nënvizon se për të parandaluar këtë fenomen negativ, duhet vepruar edhe në aspektin ligjor dhe kërkon përfshirjen e të gjithë aktorëve shoqërorë.

“Duhet të ndikojmë si shoqëri këtu edhe në aspektin ligjor, të kërkohet që edhe me ligj të jetë rreptësisht e ndaluar shitja e pijeve energjetike te të miturit. Fatkeqësisht, njerëz të papërgjegjshëm, për arsye të pakta fitimprurëse, bëjnë një gjë të tillë – ju shesin fëmijëve pije energjetike, duke pasur parasysh rrezikun e madh që ndodh pastaj tek fëmijët. Ju bëjmë apel prindërve për kujdes të shtuar dhe të komunikojnë me fëmijët e tyre, duke u shpjeguar për rreziqet. Atyre të cilët merren me tregti, mos u shisni fëmijëve dhe të miturve pije të tilla, sepse rreziku është i madh për shfaqjen e sëmundjeve kardiovaskulare, ku në mënyrë direkte e vendosin jetën e fëmijëve në rrezik.” – u shpreh Ademi.

Advertisement

Në Maqedoni, aktualisht shitja e pijeve energjike për fëmijët nuk është e ndaluar me ligj, prandaj mjeku Ademi propozon miratimin e një vendimi të tillë në Kuvend.

Ai thekson se në vendet e Bashkimit Evropian dhe të Ballkanit Perëndimor, kjo është e rregulluar ligjërisht dhe jep rezultate në mbrojtjen e shëndetit të fëmijëve. /RTM2/