Ministrja e Financave, Gordana Dimitrieska-Koçoska, mbrëmë mori pjesë dhe mbajti fjalim në edicionin jubilar të 30-të të manifestimit “Përzgjedhja e grave menaxhere më të suksesshme”, ngjarje që për tre dekada paraqet platformë të rëndësishme për promovimin e grave lidere, sipërmarrëse dhe profesioniste, të cilat japin kontribut të rëndësishëm në ekonominë dhe shoqërinë maqedonase.

Në fjalën e saj, ministrja theksoi se manifestimi është mirënjohje për gratë të cilat, me përkushtimin, profesionalizmin dhe vizionin e tyre, krijojnë vlerë dhe lënë gjurmë të qëndrueshme në komunitetin e biznesit.

“Ky manifestim nuk është vetëm shënim i një jubileu të rëndësishëm, por edhe mirënjohje për gratë që, me punën, njohuritë dhe këmbënguljen e tyre, kanë lënë gjurmë afatgjate në ekonominë maqedonase. Çdo grua e suksesshme është dëshmi se arritjet e larta janë rezultat i punës së palodhur, disiplinës, integritetit dhe guximit”, tha ministrja Dimitrieska-Koçoska.

Ajo theksoi se suksesi i grave lidere ka peshë të veçantë, duke pasur parasysh rolet e tyre të shumëfishta në jetën profesionale dhe personale, si bartëse të pozitave përgjegjëse, por edhe si mbështetje për familjen dhe komunitetin.

Ministrja theksoi se si person që vjen profesionalisht nga sektori privat, ajo e kupton mirë rëndësinë e besimit, përgjegjësisë dhe rezultateve që krijohen me kalimin e viteve.

Advertisement

“Unë vij nga sektori privat – mjedis në të cilin rezultatet maten çdo ditë, ku besimi krijohet me punë, ndërsa përgjegjësia nuk është formalitet, por mënyrë funksionimi. Aty i kam krijuar vlerat e mia profesionale, kam mësuar se suksesi kurrë nuk është individual, por është rezultat i përkushtimit, punës në ekip dhe vizionit të qartë”, theksoi ministrja.

Në fjalimin e saj, ministrja theksoi se përkrahja e grave në ekonomi dhe sipërmarrje nuk është vetëm çështje e barazisë gjinore, por edhe çështje e zhvillimit ekonomik të qëndrueshëm.

“Përkrahja e grave në ekonomi, sipërmarrje dhe lidership do të thotë mbështetje e zhvillimit ekonomik. Çdo grua që krijon vlera të reja, kontribuon në kompani të fuqishme, ekonomi më konkurruese dhe shoqëri më të fuqishme”, theksoi ministrja.

Dimitrieska-Koçoska theksoi se institucionet kanë detyrim të vazhdojnë të krijojnë mjedis në të cilin gratë do të kenë mbështetje edhe më të madhe për zhvillimin profesional, lidershipin dhe sipërmarrjen, si dhe të jenë frymëzim për gjeneratat e reja.

Në fund të fjalimit, ministrja i përgëzoi fitueset e çmimeve dhe u uroi suksese të mëtejshme në nivel personal dhe profesional, duke theksuar se arritjet e tyre janë nxitje e fuqishme për zhvillimin e ardhshëm të lidershipit të grave në vend.

Advertisement

Kryetari i Kuvendit të Maqedonisë së Veriut, Afrim Gashi, në fjalën e tij në Konferencën e 20-të të kryetarëve të parlamenteve të vendeve të Nismës Adriatiko-Joniane, ka deklaruar se Maqedonia e Veriut është e përkushtuar ndaj Bashkimit Evropian (BE), NATO-s dhe bashkëpunimit rajonal, transmeton Anadolu.

Siç njofton zyra për media e Kuvendit, Gashi si nikoqir në këtë konferencë tha se takimet e këtilla janë mundësi e shkëlqyer për shkëmbim përvojash dhe për përpjekje të përbashkëta në përcaktimin e prioriteteve për periudhën e ardhshme.

“Në kushte të sfidave të mëdha gjeopolitike me të cilat po përballet bota, besoj se fokusi ynë i përbashkët duhet të jetë bashkëpunimi, përparimi, përforcimi i lidhjeve si dhe kultivimi i vlerave që promovojnë paqen, tolerancën dhe mirëkuptimin e ndërsjellë”, tha ai.

Gashi theksoi se për Maqedoninë e Veriut, si shtet me synim strategjik anëtarësimin e plotë në BE, është tejet e rëndësishme të jetë pjesë aktive e proceseve të bashkëpunimit rajonal dhe të përfitojë nga përvojat që ndihmojnë në procesin e integrimit evropian.

Ai shtoi se vendi mbetet fuqishëm i përkushtuar ndaj integrimit evropian dhe nuk do të tërhiqet nga ky orientim strategjik, pavarësisht pengesave në procesin e anëtarësimit. Ai tha se vendi po vazhdon reformat në fusha kyçe si gjyqësori, lufta kundër korrupsionit, arsimi, shëndetësia dhe ekonomia.

Advertisement

Duke folur për diplomacinë parlamentare, ai theksoi rëndësinë e pjesëmarrjes aktive të Kuvendit dhe deputetëve në ngjarje ndërkombëtare, me qëllim forcimin e miqësive, bashkëpunimit dhe unitetit në plan global.

Gashi potencoi karakterin multietnik të vendit dhe nevojën për ndërtimin e bashkëjetesës, tolerancës dhe marrëdhënieve të mira fqinjësore, duke shtuar se stabiliteti dhe zhvillimi i vendit janë të lidhura ngushtë me prosperitetin e gjithë rajonit.

Në këtë kontekst, ai veçoi anëtarësimin në NATO në vitin 2020 si një arritje strategjike që ka forcuar sigurinë dhe sovranitetin e shtetit. “Ky është një hap i rëndësishëm në përforcimin e sigurisë dhe stabilitetit tonë dhe është garanci e fuqishme për mbrojtjen e integritetit territorial dhe sovranitetit të Maqedonisë së Veriut”, tha ai.

Në fund, kryeparlamentari Gashi theksoi rëndësinë e projekteve infrastrukturore si Korridoret 8 dhe 10 si dhe bashkëpunimin rajonal dhe zhvillimin e turizmit, duke theksuar se këto fusha janë kyçe për rritjen ekonomike dhe afrimin e vendeve të rajonit.

Advertisement

Gjykata Themelore Penale e Shkupit ka informuar se ka pranuar propozimin e Prokurorisë dhe i ka caktuar masën e paraburgimit ish-kryetarit të Federatës së Futbollit të Maqedonisë (FFM), Muamed Sejdini.

​Sejdini u arrestua mëngjesin e sotëm nga policia nën dyshimin për përvetësimin e 660,000 eurove gjatë kohës që ushtronte funksionin e kryetarit në FFM.

​Gjykata pranoi kërkesën e prokurorisë dhe i shqiptoi Sejdinit masën e paraburgimit.
​”Gjykata Themelore Penale Shkup njofton opinionin se, duke vepruar sipas propozimit të prokurorisë kompetente, ka marrë vendim me të cilin personit M.S., ish-kryetar i Federatës së Futbollit të Maqedonisë, i është caktuar masa e paraburgimit në kohëzgjatje prej 30 ditësh.

​Masa e paraburgimit është caktuar për shkak të dyshimit të bazuar se personi ka kryer veprën penale ‘Përvetësim në shërbim’.
​Njëkohësisht, gjykata vlerësoi se ekzistojnë rrethana që tregojnë rrezikun e arratisjes, si dhe mundësinë e ndikimit mbi dëshmitarët dhe dëshmitë gjatë procedurës. Gjykata do të vazhdojë të veprojë në përputhje me kompetencat ligjore dhe në interes të udhëheqjes efikase dhe të ligjshme të procedurës”, thuhet në kumtesën e Gjykatës Themelore Penale Shkup.