Qeveria ka miratuar Programin për Mbrojtjen e Konsumatorëve të Cenueshëm të Energjisë për vitin 2025, që synon përmirësimin e mbrojtjes së energjisë dhe mbështetjen e qytetarëve që përballen me sfida sociale dhe shëndetësore. Programi siguron 42.300.000 denarë nga buxheti i shtetit, të destinuara për mbështetje të drejtpërdrejtë financiare për kategoritë më të cenueshme të qytetarëve, njoftoi sot Ministria e Energjetikës, Minierave dhe Burimeve Minerale.

Programi, siç theksojnë nga Ministria, ka për qëllim të sigurojë energji të sigurt dhe të arritshme për ata që kanë më shumë nevojë.

“Mjetet janë të destinuara për mbështetje të drejtpërdrejtë financiare për familjet që jetojnë në varfëri energjetike, me fokus të veçantë tek personat me aftësi të kufizuara dhe ata që përdorin ndihmë minimale të garantuar. Përfituesit e këtij programi janë familjet që marrin ndihmë në para për të mbuluar një pjesë të kostove të konsumit të energjisë, si dhe familjet në të cilat jetojnë persona me aftësi të kufizuara të rënda ose të thella intelektuale, aftësi të kufizuara të rënda fizike, persona plotësisht të verbër ose plotësisht të shurdhër”, shpjegon Ministria.

Për këtë kategori të dytë, siç citohet në kumtesë, programi parashikon mbështetje mujore në vlerë prej 1.000 denarë, që drejtpërdrejtë hiqet nga faturat për energji elektrike të harxhuar, duke filluar nga muaji i dorëzimit të kërkesës, në kohëzgjatje prej 12 muajsh.

“Mbështetja financiare do të ndahet sipas parimit të të ardhurave më të ulëta, deri në shterimin e fondeve, si më poshtë: 2.300.000,00 denarë nga totali i mjeteve do t’u ndahen familjeve në të cilat jeton një person/persona me aftësi të kufizuara të rënda ose të thella intelektuale, 19.000.000,00 denarë nga totali i fondeve do t’u ndahen familjeve në të cilat jeton një person/persona me aftësi të kufizuara më të rënda fizike, 9.000.000,00 denarë nga totali i mjeteve do t’u ndahen familjeve në të cilat jeton një person plotësisht i verbër dhe 12.000.000,00 denarë nga totali i mjeteve do t’u ndahen familjeve në të cilat jeton një person plotësisht i shurdhër”, thonë nga Ministria e Energjetikës.

Advertisement

Qytetarët e interesuar do të mund të aplikojnë përmes shpalljes publike që do të publikohet në ueb faqen e Ministrisë së Energjetikë (www.energy.gov.mk) dhe në dy gazeta ditore. Shpallja do të jetë me afat aplikimi prej 30 ditësh. Formulari i aplikimit do të jetë i disponueshëm në internet, si dhe në arkivin e Ministrisë, ndërsa aplikantët duhet të dorëzojnë edhe dokumente me të cilat dëshmojnë plotësimin e kushteve për mbështetje financiare.

Nga Ministria e Energjetikës theksojnë se sistemimi i mjeteve do të bëhet sipas nevojave specifike të grupeve të synuara: 2,3 milionë denarë janë destinuar për familjet me persona me aftësi të kufizuara të rënda intelektuale, 19 milionë për familjet me aftësi të kufizuara më të rënda fizike, 9 milionë për familjet me një person plotësisht të verbër dhe 12 milionë denarë për ato me një person plotësisht të shurdhër.

“Procedura e përzgjedhjes do të kryhet nga katër komisione të përbëra nga punonjës të Ministrisë, të ndarë sipas llojit të aftësisë së kufizuar të personit në familje. Komisionet do të shqyrtojnë aplikimet e pranuara dhe do të përcaktojnë se cilët kandidatë i plotësojnë kushtet. Lista e përfituesve që do të marrin mbështetje financiare do të bëhet publike”, thuhet në kumtesë.

Nga Ministria theksojnë se programi parashikon edhe masa shtesë për lehtësimin e qasjes energjetike, duke përfshirë lirimin e shpenzimeve për përfshirje të sërishme, prioritet në largimin e defekteve dhe masave kundër ndërprerjeve për shkak të faturave të papaguara në periudhën e dimrit. Me këtë garantohet se asnjë familje e cila përballet me rrezik social ose shëndetësor nuk do të mbetet pa mbështetje bazë energjetike.

Të gjitha informacionet, njoftimi publik dhe formulari i aplikimit do të jenë të disponueshme në faqen e internetit të Ministrisë: www.energy.gov.mk.

Advertisement

Ministria u bën thirrje të gjithë atyre që plotësojnë kërkesat të informohen me kohë dhe të aplikojnë brenda afatit të përcaktuar.

Ministria e Energjetikës, Minierave dhe Burimeve Minerale, siç thuhet në kumtesë, mbetet e përkushtuar për krijimin e një shoqërie energjetike të drejtë dhe të qëndrueshme, në të cilën çdo qytetar ka qasje në nevojat themelore të jetës – veçanërisht ata që kanë më shumë nevojë për to.

Maqedonia po përjeton një intensifikim të trafikut turistik dhe një rritje të interesit të turistëve të huaj nga vendet e Evropës Perëndimore, kryesisht nga Franca, Gjermania dhe Britania e Madhe, njoftoi Ministria e Kulturës dhe Turizmit, e cila analizoi të dhënat e fundit mbi lëvizjen e turistëve të huaj në vend për pesë muajt e parë të vitit 2025 krahasuar me të njëjtën periudhë të vitit 2024.

“Është regjistruar një rritje prej 23,6 për qind te turistët e huaj dhe rritje prej 18,7 për qind te bujtjet e realizuara. Në pesë muajt e parë të vitit 2025, qarkullimi turistik në Maqedoni shënon rritje të dukshme në krahasim me periudhën e njejtë të vitit 2024. Veçanërisht dallohet Gjermania me rritje prej 219 për qind në numrin e turistëve dhe 146 për qind në bujtje, duke treguar një interes të shtuar ndjeshëm të turistëve gjermanë për të vizituar vendin tonë. Franca regjistroi rritjen më të lartë me 398 përqind më shumë turistë dhe 303 përqind më shumë bujtje, duke u pozicionuar si një objektiv i ri strategjik i politikave turistike. Britania e Madhe regjistroi një rritje të konsiderueshme prej 204 përqind të numrit të turistëve dhe 139 përqind të bujtjeve. Turqia, e cila ishte tregu kryesor në vitin 2024, vazhdon me një rritje të qëndrueshme prej 11 përqind të numrit të turistëve dhe 21 përqind të bujtjeve, duke ruajtur pozicionin e saj të parë për sa i përket numrit të përgjithshëm të turistëve dhe bujtjeve”, informoi Ministria.

Këto rezultate, nënvizohet në kumtesë “konfirmojnë dinamikën pozitive dhe interesin e rritur për Maqedoninë si destinacioni turistik atraktiv i hartës evropiane”.

“Maqedonia shënon një interes në rritje midis vizitorëve të huaj për turizëm kulturor në muajt jashtë sezonit tradicional, gjë që kontribuon ndjeshëm në anulimin e turizmit sezonal, rritjen e të ardhurave totale nga turizmi dhe forcimin e ekonomisë lokale. Ky trend është me rëndësi të jashtëzakonshme sepse krijon aktivitet të vazhdueshëm turistik gjatë gjithë vitit, angazhon komunitetet lokale, artizanët, guidat dhe ofruesit e ushqimit, dhe mundëson zhvillim të ekuilibruar ekonomik jashtë qendrave turistike”, deklaron Ministria e Kulturës dhe Turizmit.

Ministria shton se do t’i përdorë këto të dhëna “për të synuar me saktësi aktivitetet promovuese, për të përgatitur programin e sektorit të turizmit, për të forcuar lidhjet ajrore me tregjet e reja dhe për të mbështetur në mënyrë aktive operatorët e turizmit”.

Advertisement

Nga nëntori i këtij viti, Shkupi do të lidhet  edhe  me pesë destinacione të reja evropiane përmes linjave të reja të rregullta ajrore, njoftoi sot zëvendëskryeministri dhe ministri i Transportit, Aleksandar Nikolloski.

Destinacionet e reja janë Madridi dhe Stokholmi, me fluturime drejt Shkupit që nisin në nëntor, si dhe Praga, Bari dhe Këlni, linjat e të cilave do të fillojnë në dhjetor.

“Këtë mëngjes e nënshkruam marrëveshjen për pesë destinacione të reja që do të operohen nga Aeroporti i Shkupit. Këto linja ajrore do të sjellin më shumë turistë, më shumë biznese në Maqedoni dhe më shumë mundësi për të gjithë qytetarët,” deklaroi Nikolloski.

Me këto pesë linja të reja, numri i linjave të reja ajrore të hapura gjatë vitit të fundit arrin në 16. Zëvendëskryeministri bëri të ditur se të dhënat nga aeroportet konfirmojnë trendin e rritjes – në gjysmën e parë të vitit 2025, përmes aeroporteve të Shkupit dhe Ohrit janë transportuar gjithsej 1.5 milionë pasagjerë. Kjo paraqet një rritje prej 5% në Aeroportin e Shkupit dhe 11% në atë të Ohrit, krahasuar me të njëjtën periudhë të vitit të kaluar.

“Në periudhën e ardhshme do të ketë edhe lajme të mira – do të shpallim linja të tjera të reja ajrore,” shtoi Nikolloski, duke shprehur shpresën se këto risi do të kontribuojnë në zhvillimin ekonomik dhe në rritjen e lidhjes së Maqedonisë me Evropën.

Advertisement