Kandidati për kryetar të Komunës së Çairit nga koalicioni VLEN, Izet Mexhiti, në emisionin “Hajde flasim” në TV21 ka zbuluar ekskluzivisht planin e tij për zgjidhjen e një prej çështjeve më të diskutuara dhe m problematike në zonën e Bit Pazarit, mbikalimin për këmbësorë.

“Ende nuk e kam promovuar publikisht, por po e them ekskluzive këtu,” deklaroi Mexhiti, duke theksuar se ka qenë në komunikim të vazhdueshëm me Shoqatën e tezgaxhinjve të Bit Pazarit. Ai tha se projekti i mëparshëm me urën nuk ka dhënë rezultatet e pritura, pasi qytetarët nuk e përdornin atë.

“Psikologjia e njeriut është që nuk do as mbikalim, as nënkalim. Madje edhe esnafët e Çarshisë thonë se dyqanet që kanë nja dy shkallë nuk e kanë vlerën e atyre që janë në nivel të rrafshët” u shpreh Mexhiti.

Ai shtoi se kishte propozuar edhe një ide me ashensorë dhe shkallë, por sipas tregtarëve, ajo do të ishte investim i kotë, sepse as atë nuk do ta përdorin.

Sipas Mexhitit, zgjidhja përfundimtare është largimi i mbikalimit ekzistues dhe ndërtimi i një vendkalimi zyrtar për këmbësorë me semaforë.

Advertisement

“Fatmirësisht, komuna e Çairit nuk ka dhënë asnjë denarë për ndërtimin e asaj ure. Ajo është bërë në këmbim të hapësirës për reklama me kompaninë Akzent Media dhe komuna nuk ka asnjë obligim financiar. Prandaj, zgjidhja më e mirë është prishja e urës dhe vendkalimi zyrtar me semaforë,” theksoi ai.

Mexhiti shtoi se ky vendim do të jetë në përputhje me nevojat reale të qytetarëve dhe tregtarëve të Bit Pazarit, duke sjellë një zgjidhje më praktike dhe funksionale për qarkullimin në këtë zonë.

Moti me diell dhe vranësira të vogla. Do të fryjë dhe erë e dobët deri në mesatare nga drejtimi verior. Temperatura minimale do të jetë në interval prej 0 deri në 10, ndërsa ajo maksimale do të arrij prej 15 deri në 23 gradë.

Në Shkup moti do të jetë i ngjashëm, me diell dhe vranësira të vogla. Do të fryjë dhe erë e dobët nga drejtimi verior. Temperatura minimale do të ulet në 9, ndërsa ajo maksimale do të arrij në 21 gradë Celsiusë.

Gjykata Themelore Penale në Shkup ka vlerësuar se raportet e ekspertëve të mbrojtjes dhe Prokurorisë lidhur me gjendjen psikike të të akuzuarit Rade Trajkovski Shtekli nuk janë kontradiktore, duke refuzuar pretendimet e mbrojtjes se ai nuk është i aftë të ndjekë gjykimin në seancën kryesore të rastit të tregtisë me drogë.

Kryetari i Këshillit Gjyqësor, gjykatësi Ilija Tërpkov, para fillimit të seancës informoi se kundërshtimi i mbrojtjes për paaftësinë e të akuzuarit për të ndjekur gjykimin u refuzua. Sipas Gjykatës, Trajkovski është kontrolluar nga psikiatrja Olivera Subotin Popovska, e cila dha një mendim të qartë se i akuzuari është i aftë të ndjekë gjyqin. Ndërkaq, ekspertiza e mbrojtjes u bë nga një mjek që ka qenë mjek personal i Trajkovskit për shumë vite, gjë që mund të krijojë bazë për paragjykim.

“Vetëm në raste të jashtëzakonshme urdhërohet një super ekspertizë, por në këtë rast Gjykata u bind nga ekspertja Olivera lidhur me aftësinë e të akuzuarit Rade Trajkovski për të ndjekur gjykimin”, deklaroi gjykatësi Tërpkov.

Aktakuza, e ngritur nga Prokuroria për Ndjekjen e Krimit të Organizuar, përfshin 10 persona, pas një hetimi pothuajse njëvjeçar në të cilin u aplikuan masa të posaçme hetimore. Fillimisht, ishin përfshirë 16 persona, shtatë prej të cilëve tashmë kanë lidhur marrëveshje për pranimin e fajësisë dhe kanë marrë dënime me burg nga 3 deri në 3,5 vjet.

Katër të akuzuar – Danço Masev, Dimitar Trajkov, Vladimir Veselinovski dhe Branislav Zajkov – gjithashtu kanë dorëzuar deklaratë për fajësi, pas së cilës Gjykata mori vendim për ndarjen e procedurës penale.

Advertisement

Sipas Prokurorisë, grupi ishte i organizuar mirë, me role të qarta nga sigurimi deri te shitja e kokainës dhe marihuanës. Droga ruhej në apartamente me qira dhe shitej me çmime që varionin, kokainë me çmim 4,500–6,000 denarë për gram, marihuanë me 200–300 denarë për gram. Komunikimi brenda grupit zhvillohej përmes aplikacionit Snapchat, ndërsa provat kryesore u siguruan përmes sistemit të analizës së telefonave celularë “Cellebrite”, donacion nga SHBA.