Një shtetase 19 vjeçe e Turqisë është arrestuar në Gostivar. Sipas Policisë, tek e njëjta janë gjetur substanca narkotike.

“Më 18.09.2025, në orën 12:45 në Gostivar, zyrtarë policorë nga Sektori i Punëve të Brendshme – Gostivar e kanë privuar nga liria A.B. (19) nga Republika e Turqisë, pasi tek ajo janë gjetur dhe konfiskuar tableta dhe një send me mbetje marihuane. Më vonë, me urdhër gjyqësor, është kryer kontroll në banesën dhe hapësirat ndihmëse ku ajo jeton dhe i përdor në Gostivar, ku janë gjetur dhe konfiskuar një bluarëse me mbetje marihuane, tableta, substancë e bardhë pluhur, peshore digjitale, një qese me fara kanabisi dhe sende të tjera për të cilat dyshohet se rrjedhin nga vepër penale”, thonë nga MPB.

Kryeministri në detyrë i Kosovës, Albin Kurti ka thënë se nuk janë prishur me Amerikën, por se kanë disa dallime.

Teksa ka komentuar vendimin për pezullim të dialogut të planifikuar strategjik nga Ambasada e SHBA-së në Prishtinë, Kurti ka thënë se nuk do t’i minimizojë zhvillimet e fundit.

“Nuk jemi prishur me Amerikën, por kemi disa dallime. Ndonëse opozitarët po e stërmadhojnë në dritë negative çdo ndodhi për raportet e Qeverisë sonë me Qeverinë amerikane, unë nuk dua t’i minimizojë zhvillimet e fundit, i siguroj qytetarët tanë se qeveria jonë i trajton seriozisht deklaratat dhe qëndrimet e Ambasadës Amerikane”, tha Kurti në mbledhjen e Qeverisë.

Koalicioni VLEN përmes një komunikate duke komentuar kandidaturën e Mojsovskës për qytetin e Strugës ka theksuar se BDI e ka nxjerrë në shitje Strugën, duke u bërë bashkë me Levicën e Apasievit për ta penguar fitoren e Mendi Qyrës.

“Kandidatura e Mojsovskës është pazar i turpshëm, i kurdisur për të mbajtur gjallë një pushtet të kalbur që struganët e refuzojnë. Kjo nuk është hera e parë që BDI bën pazare me Levicën: nga Shkupi e Velesi, deri te busti i Andon Lazov Qosetos në mes të kryeqytetit, çdo herë qytetarët kanë paguar çmimin e këtyre marrëveshjeve të pista. Por këtë herë, Struga nuk do të bjerë pre. Me 19 tetor, struganët do ta thonë fjalën e fundit: Struga nuk shitet, Struga çlirohet. Me votën e tyre, do të mbyllet një kapitull dhe do të hapet një epokë e re, e pastër dhe e ndershme, me Mendi Qyrën. BDI e ka nxjerrë në shitje Strugën, duke u bërë bashkë me Levicën e Apasievit për ta penguar fitoren e Mendi Qyrës”, thuhet në komunikatën e VLEN-it.