Rruga e butiqeve, dikur një nga pjesët më të frekuentuara të qytetit gjatë muajve të verës, sot, duket ndryshe. Pronarët e bizneseve thonë se kriza ekonomike ka ndikuar dhe dukshëm ka rënë numri i klientëve. Megjithatë, kanë një shpresë se me ardhjen e mërgimtarëve, do të rritet puna. Madje në shenjë mirënjohje për mërgimtarët, ata kishin vendosur edhe në mbishkrim mirëseardhje.Shitësit në këtë zonë thonë se puna ka rënë nga viti në vit.

Por ka edhe biznese që thonë se puna e tyre nuk është e lidhur drejtpërdrejtë me sezonin e verës dhe dasmat por se puna e tyre është konstante. Megjithatë, ata thonë se fluksi i njërëzve është më i ulët krahasuar me vitet e kaluara.

Në këtë rrugë mund të shihje shumë letra se lokalet jepen me qera dhe gjithashtu letra të ngjitura ku kërkoheshin punëtorë. Por si duket Tetova ka krizë për të dy këto sende kyqe, biznese të sukseshme dhe punëtorë./Tv Koha/ 

Kontrollet e përbashkëta kufitare “One Stop” tashmë funksionojnë në pikat kufitare me Serbinë dhe Kosovën, ndërsa me nënshkrimin e marrëveshjes me Republikën e Shqipërisë do të përmbyllet procesi i vendosjes së këtij sistemi modern me të gjithë fqinjët që nuk janë pjesë e zonës Shengen, njoftojnë nga Ministria e Punëve të Brendshme.

Nga MPB bëjnë të ditur se tashmë është ulur koha e pritjes në pikat kufitare ku ky sistem është në funksion.

“Rezultatet tashmë janë të dukshme. Në Tabanoc, edhe pse këtë verë numri i udhëtarëve është rritur me 15 deri në 20 për qind, koha e pritjes është ulur ndjeshëm. Të njëjtën gjë e mundësuam edhe në Bllacë – Hani i Elezit, ndërsa me vënien në funksion të sistemit në Jazhincë – Glloboçicë e përmbyllëm zbatimin e kontrolleve të përbashkëta me Republikën e Kosovës”, thuhet nga MPB.

Me zbatimin e sistemit “One Stop”, qytetarët përfitojnë një ndalesë të vetme, një kontroll të vetëm kufitar dhe kohë dukshëm më të shkurtër pritjeje.

Zbatimi i sistemit “One Stop Shop” fillimisht do të nisë në pikën kufitare Qafë Thanë, ndërsa më pas do të zgjerohet edhe në pikat e tjera kufitare me Shqipërinë.

Advertisement

Më 16 qershor, Qeveria njoftoi se kishte miratuar vendosjen në funksion të sistemit të kontrolleve të përbashkëta kufitare “One Stop Shop” me Republikën e Shqipërisë.

Nevoja për një zgjidhje të tillë, sipas Qeverisë, dëshmohet më së miri nga fluksi i madh i udhëtarëve në pikat kufitare me Shqipërinë.

Gjatë vitit 2025, në këto pika kufitare janë regjistruar gjithsej 4.581.724 udhëtarë, prej të cilëve 2.318.080 kanë kaluar nëpër pikën kufitare Qafë Thanë.

Komiteti Ekzekutiv i LSDM-së ka miratuar një konkluzion me të cilin u bën thirrje publike të gjithë individëve dhe grupeve që të zhvillojnë debat brenda partisë lidhur me, siç thonë ata, luftën kundër pushtetit kriminal të Hristijan Mickoskit.

Në kumtesën e publikuar pas mbledhjes së partisë thuhet se Komiteti Ekzekutiv vlerësoi se çdo debat që ka të bëjë me LSDM-në duhet të zhvillohet brenda partisë, përpara organeve dhe trupave të saj, e jo jashtë saj.

“Dyert e LSDM-së janë të hapura për secilin që ia do të mirën partisë dhe që ndan vlerat progresive. Vetëm përmes dialogut dhe ballafaqimit të argumenteve brenda partisë mund të zhvillohet debat, e jo përmes mediave apo iniciativave dhe platformave jashtëpartiake që i shkaktojnë dëm dhe e dobësojnë partinë nga brenda. Qëllimi ynë i përbashkët është i qartë – LSDM po riorganizohet dhe po përgatitet për një luftë të fuqishme, të pakompromis dhe të organizuar kundër politikave të gabuara sociale, ekonomike dhe politike shkatërruese të VMRO-së, të cilat e shtyjnë shtetin drejt izolimit dhe qytetarët drejt varfërisë së thellë”, thuhet në reagimin e LSDM-së.

Nga partia theksojnë se ka ardhur koha për bashkimin e radhëve, për guxim dhe për një luftë të vendosur kundër, siç e quajnë ata, pushtetit shpërdorues. Ata u bëjnë thirrje të gjithë socialdemokratëve dhe forcave progresive që të qëndrojnë “krah për krah”.

Këto përfundime të Komitetit Ekzekutiv dhe thirrja për unitet vijnë pas disa ditësh reagimesh dhe akuzash ndaj pjesëmarrësve në iniciativën “Biseda për të Ardhmen 12:05”.

Advertisement

Kryetari i LSDM-së, Venko Filipçe, në disa raste e ka kritikuar këtë iniciativë, duke e vlerësuar si përpjekje për ta minuar partinë.

Ai e quajti atë “Projekti ZNAM 2.0 – platforma për të ardhmen e Mickoskit”.

Sipas Filipçes, përplasjet e brendshme në LSDM po ndodhin në një moment jashtëzakonisht të papërshtatshëm, kur partia po kalon një proces të vështirë të rindërtimit të organizatave komunale dhe organeve partiake pas humbjes së rëndë në zgjedhje.