Lajme nga vendi
Fundi i rampave të pagesës në Maqedoni? Qeveria planifikon sistem të ri sipas kilometrave të përshkuar
Maqedonia po përgatit ndryshime të rëndësishme në mënyrën e pagesës së autostradave. Në të ardhmen, drejtuesit e automjeteve mund të paguajnë sipas kilometrave realisht të përshkuar, në vend të sistemit aktual me tarifa fikse në pikat e pagesës.
Ministri i Transportit, Aleksandar Nikolloski, ka bërë të ditur se po përgatiten ndryshime ligjore për modelin e ri, të cilat pritet të prezantohen gjatë muajit dhjetor.
Sipas paralajmërimeve, synimi është krijimi i një sistemi modern elektronik që do të mundësojë pagesë më efikase dhe më të drejtë, duke reduktuar ndalesat dhe kolonat në pikat e pagesës.
Një nga risitë kryesore është që tarifa të llogaritet sipas distancës së kaluar në autostradë. Kjo do të thotë se drejtuesit që përdorin segmente më të shkurtra do të paguajnë vetëm për kilometrat e përshkuar, duke e bërë sistemin më të drejtë për të gjithë përdoruesit.
Gjithashtu, po shqyrtohet edhe zbatimi i teknologjisë moderne për pagesë elektronike, e cila do t’u lejonte automjeteve të kalojnë pa u ndalur në rampa, ndërsa lëvizja e tyre do të regjistrohej automatikisht. Një zgjidhje e tillë pritet të zvogëlojë ndjeshëm pritjet dhe kolonat, sidomos gjatë sezonit veror dhe festave.
Megjithatë, autoritetet theksojnë se ende nuk është marrë një vendim përfundimtar për heqjen e plotë të rampave ekzistuese.
Në hartimin e modelit të ri do të përfshihen edhe ekspertë nga Komuniteti Evropian i Transportit, të cilët do të ndihmojnë në harmonizimin e sistemit me standardet evropiane.
Për momentin, sistemi aktual i pagesës mbetet në fuqi. Ende nuk janë përcaktuar tarifat sipas kilometrave dhe as data se kur mund të nisë zbatimi i modelit të ri, pasi për këtë nevojiten ndryshime ligjore, përgatitje teknike dhe ndërtimi i infrastrukturës përkatëse.
Lajme nga vendi
Sot ulje e re e çmimit të naftës në tregjet botërore
Çmimet e naftës sot shënuan një ulje të re në tregjet botërore, pasi u publikuan të dhëna që tregojnë se rezervat e naftës së papërpunuar dhe karburanteve në SHBA janë rritur gjatë javës së kaluar. Megjithatë, rënia e çmimeve u kufizua për shkak të vazhdimit të sulmeve mes SHBA-së dhe Iranit, si dhe problemeve me transportin e naftës përmes Ngushticës së Hormuzit. Sipas të dhënave më të fundit nga tregjet, kontratat e së ardhmes (futures) të naftës së papërpunuar “Brent” u ulën për 61 centë, përkatësisht për 0,7 për qind, duke arritur çmimin prej 92,53 dollarë për fuçi në orën 05:50 sipas Grinuiçit.
Njëkohësisht, rënie shënoi edhe nafta referente amerikane WTI. Kontratat e saj u liruan për 1,24 dollarë, ose për 1,4 për qind, me ç’rast çmimi zbriti në 84,77 dollarë për fuçi.
Analistët theksojnë se tregu i naftës aktualisht ndodhet nën ndikimin e dy rrethanave të kundërta. Nga njëra anë, rezervat e rritura të naftës dhe karburanteve në SHBA krijojnë presion për uljen e çmimeve, ndërsa nga ana tjetër, tensionet gjeopolitike dhe pengesat në transportin e naftës e mbajnë të lartë pasigurinë në treg.
Vandana Hari, themeluese dhe drejtoreshë ekzekutive e kompanisë “Vanda Insights”, shpjegon se nafta e papërpunuar është nën ndikimin e vlerës së shtuar të vazhdueshme që krijon rreziku gjeopolitik, veçanërisht për shkak të sulmeve ndaj cisternave (tankerëve) dhe përshkallëzimit të përplasjeve mes SHBA-së dhe Iranit.
Në të njëjtën kohë, disponimi në treg po bëhet gjithnjë e më negativ për shkak të parashikimeve të analistëve se mund të shfaqet një tepricë e konsiderueshme e ofertës së naftës në raport me kërkesën.
Pikërisht këta faktorë krijojnë lëvizje të kundërta në tregjet botërore, për shkak të së cilës çmimet e naftës vazhdojnë të mbeten të ndjeshme ndaj informacioneve të reja për gjendjen e rezervave, zhvillimet gjeopolitike dhe transportin përmes njërit prej korridoreve më të rëndësishme detare në botë – Ngushticës së Hormuzit.(INA)
Lajme nga vendi
Pa bullgarët në Kushtetutë, pa përparim drejt BE-së? Siljanovska kundër ndryshimeve të reja!
Presidentja Gordana Siljanovska-Davkova ka kundërshtuar ndryshimet e shpeshta kushtetuese nën ndikimin e faktorit ndërkombëtar, ndërkohë që përfshirja e bullgarëve në Kushtetutë mbetet kusht për avancimin e Maqedonisë së Veriut drejt BE-së.
Në 35-vjetorin e Kushtetutës, ajo deklaroi se 21 nga 36 amendamentet kushtetuese janë miratuar nën ndikimin ndërkombëtar, duke vlerësuar se ndërhyrjet e vazhdueshme e dobësojnë rëndësinë e aktit më të lartë juridik.
Siljanovska-Davkova kërkoi përfshirjen e ekspertëve në shqyrtimin e ndryshimeve të ardhshme kushtetuese.
Ndërkohë, ndryshimet kushtetuese për përfshirjen e bullgarëve vazhdojnë të jenë kusht për përparimin e procesit eurointegrues./Slloboden Peçat
Lajme nga vendi
Pagesa elektronike e autostradave, sistemi i ri pritet të përfshijë edhe aksin Gostivar–Tetovë
Maqedonia e Veriut po përgatit ndryshimin e sistemit të pagesës së taksave rrugore në autostrada. Në vend të ndalesave në pikat fizike të pagesës, planifikohet vendosja e një sistemi elektronik, ku tarifa do të llogaritet sipas kilometrave të përshkuar.
Lajmi është veçanërisht i rëndësishëm për qytetarët e Gostivarit, pasi sistemi i ri parashihet të zbatohet edhe në autostradën Gostivar–Tetovë, si dhe në aksin Bukojçan–Gostivar.
Zëvendëskryeministri dhe ministri i Transportit, Aleksandar Nikolloski, bëri të ditur se për hartimin e ligjit të ri do të përfshihen edhe ekspertë të Komunitetit Evropian të Transportit. Ai shpreson që projektligji të prezantohet gjatë muajit dhjetor.
Sipas Nikolloskit, pagesa sipas kilometrave do të jetë më e drejtë për qytetarët, do të ulë kostot për disa udhëtime dhe do të mundësojë qarkullim më të shpejtë, pa ndalesa në pikat e pagesës.
“Idetë tona janë që pagesa të bëhet sipas kilometrave të përshkuar, gjë që do të jetë shumë më e drejtë se sistemi aktual”, deklaroi Nikolloski.
Sistemi fillimisht pritet të aplikohet në autostradën Kërçovë–Ohër, ndërsa më pas të shtrihet edhe në akset e tjera që janë në ndërtim, përfshirë Prilep–Manastir, Bukojçan–Gostivar, Gostivar–Tetovë dhe Kërçovë–Bukojçan.
Për momentin, bëhet fjalë për një plan që kërkon përgatitje ligjore dhe teknike. Ende nuk janë bërë të ditura tarifat konkrete dhe mënyra e funksionimit të sistemit të ri. Gostivari Sot

