Presidentja e Komisionit Evropian, Ursula von der Leyen, ka përcjellë një porosi të qartë dhe të drejtpërdrejtë nga Shkupi, duke theksuar se rruga evropiane e Maqedonisë së Veriut varet tani vetëm nga vullneti i saj për të përmbushur obligimet e marra – para së gjithash, ndryshimet kushtetuese.

Në një postim në rrjetin social X (ish-Twitter), pas takimeve zyrtare me liderë politikë dhe institucionalë në Shkup, von der Leyen ritheksoi mbështetjen e Bashkimit Evropian, por njëkohësisht nuk kurseu as paralajmërimin:

⁠“Ne mbetemi plotësisht pas Maqedonisë së Veriut në rrugën e saj drejt BE-së. Mund të llogarisni tek ne. Por hapi i radhës dhe i vetëm para hapjes së negociatave është i qartë: Duhet të realizoni ndryshimin kushtetues të rënë dakord. Topi është në fushën tuaj. BE-ja është e gatshme.”

Ky qëndrim vjen në një kohë kur procesi i integrimit të Maqedonisë së Veriut ka ngecur, për shkak të refuzimit të brendshëm politik për të miratuar ndryshimet kushtetuese të domosdoshme për të avancuar negociatat me BE-në – në veçanti, ato që lidhen me përfshirjen e bullgarëve në Kushtetutë, në përputhje me marrëveshjen me Sofjen.

Von der Leyen nuk ka lënë vend për interpretime – BE-ja nuk do të lëvizë pa përmbushjen e kushteve. Takimet me kryeministrin Hristijan Mickoski, kryetarin e Kuvendit dhe përfaqësues të partive politike, duket se kanë pasur një synim të vetëm: t’u kujtojë udhëheqësve të vendit se bllokimi i procesit nuk vjen nga Brukseli, por nga Shkupi.

Advertisement

Ky mesazh shihet nga analistët si një goditje e drejtpërdrejtë ndaj politikës së brendshme në RMV, e cila prej kohësh po shmang marrjen e vendimeve të vështira, ndërkohë që për opinionin publik Qeveria aktuale fajin shpesh ia atribuon BE-së.(INA)

Kryesuesi i listës së VLEN-it të kandidatëve për këshilltarë në Tetovë, Albi Qamili, ka akuzuar kandidatin e BDI-së për kryetar komune, Bajram Rexhepin, për zhvatjen e komunës së Tetovës me kamatë dhe me përmbarues.

Ai tha se një njeri i tillë nuk ia do të mirën Tetovës.

“Nuk mund ta dojë të mirën e Tetovës dikush që e çon atë në përmbarues për interesa personale. Një person i tillë, ironikisht, sot kërkon që ta menaxhojë komunën të cilën e paditi, e çoi në përmbarues dhe e zhvati me kamatë”, deklaroi Qamili.

Ai përkujtoi se ndërsa paratë e veta i merr nga buxheti i qytetarëve me përmbarues dhe me kamatë, Bajram Rexhepi votonte për uljen e pagave për administratën e komunës gjatë mandatit kur ishte këshilltar.

“Këta njerëz nuk ngopen. I njëjti njeri që padiste dhe zhvate komunën që e la borxh deri në fyt, sot kërkon mundësi të tjera të kthehet në krye të saj. Çfarë do të bëjë paditësi dhe zhvatesi i komunës së Tetovës nëse vjen në krye të saj? A do t’i ulë pagat e administratorëve për 30% siç bëri gjatë viteve 2013–2017 si këshilltar, gjersa paratë e tij i kërkon me kamatë dhe me përmbarues?”, tha Qamili.

Advertisement

Bartësi i listës së VLEN-it për Tetovën tha se Tetovës i duhet një njeri punëtor, i ndershëm, që interesin e qytetarëve e vendos mbi interesin personal. Nga dy kandidatët në garë, sipas tij, këto veti i ka vetëm Bilall Kasami.

Kandidati i koalicionit VLEN për kryetar të Komunës së Çairit, Izet Mexhiti në konferencën e sotme për media theksoi rëndësinë e zgjerimit të burimeve buxhetore përmes fondeve evropiane, me theks të veçantë në programin Horizon Europe, si një mundësi reale për zhvillim të qëndrueshëm dhe modernizim të komunës.

Mexhiti, i shoqëruar nga këshilltari i tij për financa dhe buxhet, Bujamin Bela, tha se prioritet i ekipit të tij është krijimi i një
diversiteti në strukturën buxhetore dhe sigurimi i burimeve të reja të financimit për të shtuar investimet kapitale dhe projektet afatgjata zhvillimore.

“Ne si prioritet e kemi të krijomë një diversitet në strukturën buxhetore dhe burrimet e financimit për ta shtuar masën dhe hapsirën për investime kapitale dhe projekte zhvillimore afatgjata. Në këtë drejtim në vazhdimësi po hulumtojmë mënyra të ndyshme të financimit për ta bërë një Çair më të zhvilluar, inovativ dhe konkurrues, Sipas informacioneve deri më tani, Maqedonia e Veriut ka përfituar vetëm rreth 12 milionë euro neto nga programet e Horizon-it që përbën vetëm 0.03% të shumës së përgjithshme të fondeve të disponueshme. Ky është një tregues i qartë se kemi hapësirë të madhe për rritje, dhe është koha që komunat tona, e sidomos Çairi, të marrin më shumë rol në këtë drejtim”, deklaroi Mexhiti.

Ai shtoi se Çairi do të ndjekë një qasje të re zhvillimore, duke aplikuar për projekte që sjellin më shumë investime, vende pune dhe shërbime cilësore për qytetarët, përmes fondeve evropiane dhe bashkëpunimit ndërkombëtar. Në fjalimin e tij, Mexhiti prezantoi katër prioritete të programit të tij për zhvillimin e komunës:

1.Energjia dhe efikasiteti energjetik,
2.Tranzicioni i gjelbër dhe menaxhimi i mbeturinave,
3.Digjitalizimi dhe teknologjitë e informacionit,
4.Inovacioni dhe kërkimi shkencor.

Advertisement

Këshilltari për financa dhe buxhet i Izet Mexhitit, Bujamin Bela theksoi se programi Horizon Europe nuk përfaqëson vetëm një burim financiar, por edhe një mundësi të gjerë për integrim dhe bashkëpunim ndërkombëtar.

“Me një buxhet total prej 95.5 miliardë euro për periudhën 2021–2027, me zgjatje deri më 2035, ky program hap potenciale të mëdha për reforma lokale, zhvillim të qëndrueshëm dhe forcim të lidhjeve me Bashkimin Evropian”, potencoi Bela

-“Sfidat Urbane dhe Rezistenca Klimatike”, projekt me vlerë totale prej 10 milionë euro, në të cilin Çairi do të marrë pjesë si replikator krahas qyteteve si Barcelona, Berlini, Milano, Lisbona, Porto, Bukureshti dhe Athina;
-“Co4RES”, një nismë evropiane që integron burimet e rinovueshme në rrjetin energjetik, me mbi 39 partnerë nga 15 vende, që përdor mekanizma digjitalë dhe analiza të avancuara të të dhënave për të rritur efikasitetin dhe qëndrueshmërinë energjetike;
-“Qyteti i qëndrueshëm dhe rezistent ndaj ndryshimeve klimatike”, që përfshin gjelbërim urban, menaxhim të nxehtësisë, instalim të sistemeve solare (PV) në shkolla e spitale, si dhe promovim të transportit elektrik dhe eficiencës energjetike.

“Duke parë këto mundësi, ne kemi filluar punën konkrete: Në komunën e Çairit jemi duke krijuar grupe punuese të specializuara për fondet evropiane, të përbëra nga profesionistë të fushave të ndryshme, që do të
përgatisin dhe aplikojnë për projekte konkrete në kuadër të Horizon Europe dhe programeve të tjera të BE-së” theksoi kandidati i koalicionit VLEN për kryetar komune në Çair, Izet Mexhiti.

Në përmbyllje, ai nënvizoi se synimi i tij dhe i ekipit të VLEN-it në Çair është i qartë dhe ambicioz:

“Synimi ynë është i qartë dhe ambicioz: Çairi të bëhet komuna lidere në shfrytëzimin e fondeve evropiane në Republikën e Maqedonisë së Veriut. Së bashku, me përkushtim, transparencë dhe dije, do ta ndërtojmë Çairin e së ardhmes, të gjelbër, digjital dhe inovativ!”, deklaroi Mexhiti.

Advertisement