Lajme nga vendi
Investimet në panele diellore ulin importin e rrymës në Maqedoninë e Veriut
Komisioni Rregullator për Energjetikë ka bërë të ditur se gjatë verës amvisëritë në Maqedoninë e Veriut do të furnizohen me rrymë më të lirë dhe gjatë ditës do të kenë plus një orë rrymë me tarifë të ulët.
Kjo vjen si rrjedhojë e prodhimit të rrymës nga investimet nga centralet diellore – panelet fotovoltaike që ka ulur dhe importin e rrymës nga jashtë.
Komisioni Rregullator për Energjetikë në Maqedoninë e Veriut ka bërë të ditur se importi i rrymës gjatë vitit të kaluar (2023), ka shënuar nivelin më të ulët, me vetëm 2.74 për qind nga konsumi i përgjithshëm për dallim nga vitet e mëparshme ka qenë rreth 30 për qind.
Nga ky institucion kanë bërë të ditur se prodhimi i rrymës nga centralet diellore përmes paneleve fotovoltaike brenda një viti është rritur për 300 për qind.
Kryetari i Komisionit Rregullator për Energjetikë, Marko Bislimovski, tha për Radion Evropa e Lirë (REL), se po shqyrtohet mundësia që për amvisëritë brenda ditës të ketë edhe një orë shtesë të furnizimit me tarifën e lirë të energjisë elektrike.
Aktualisht, brenda ditës amvisëritë me tarifën e lirë të rrymës furnizohen nga ora 13 deri në 15, ndërkohë komisioni po shqyrton mundësinë që ky orar të zgjatet deri në orën 16, si dhe uljen e çmimit të rrymës, në përgjithësi.
“Besoj se importi i energjisë elektrike edhe gjatë vitit 2024 do të jetë shumë i ulët gjë që është në të mirë të shtetit, për faktin se energjinë elektrike arrijmë ta sigurojmë vetë dhe nuk jemi të detyruar të furnizohemi me rrymë nga jashtë vendit. Kjo me gjasë do ta ulë dhe çmimin e energjisë elektrike”, tha për REL-in Bislimovski.
Prodhuesit e rrymës nga panelet fotovoltaike thonë se është shumë e komplikuar mbledhja e dokumentacionit për të marrë leje për ndërtimin e centraleve nga burimet e ripërtërishme krahas investimeve të mëdha.
Goran M. i cili ka një central të fotovoltaikëve në rrethinën e Shkupit, thotë se i është dashur të sigurojë 40 dokumente nga institucionet e ndryshme të vendit për sigurimin e lejeve për ndërtimin e tij. Ai thotë se krahas shpenzimeve financiare, kjo i ka marrë edhe shumë kohë dhe energji.
Procedura, sipas tij, komplikohet për shkak të mungesës së kuadrit profesional për energjetikë në institucionet e vendit, po edhe për shkak të mbingarkesës:
“Investimi humb kuptimin për shkak të periudhës së gjatë kohore nga fillimi i punimeve në terren deri te prodhimi i rrymës, përkatësisht fillimi i kthimit të investimit. E gjithë kjo ndodh pasi mbledhja e dokumentacionit përkatës zgjat 2 deri në 3 vjet”, thotë ai për REL-in.
Pasi këto investime mbështeten kryesisht nga kreditë bankare, zvarritja e realizimit të projekteve që kanë të bëjnë me centralet diellore, i bën edhe më të komplikuara.
Ekspertët e energjetikës thonë se ulja e importit të rrymës nuk është dhe aq për duartrokitje pasi pjesa më e madhe investimeve në centralet diellore është kapital i huaj.
David Noshpall, magjistër teknologjisë elektronike dhe informatike, i cili ka dhe një kompani për mbarëvajtjen dhe realizimin e centraleve me panele fotovoltaike tha se përderisa pjesa më e madhe e centraleve diellore me panele fotovolatike është investim privat i kompanive të huaja dhe një pjesë e kompanive vendore dhe nuk është në pronësi të shtetit, nuk mund të llogaritet si prodhim vendor. Sipas tij, në këtë rast nuk mund të flitet për zhvillim ekonomik.
“Ajo që është e rëndësishme për shtetin dhe qytetarët, është rritja e prodhimit të energjisë elektrike përmes burimeve të ripërtërishme me kapital vendor, duke investuar në hidrocentrale dhe centralet diellore dhe të njëjtat të kenë mundësi të skladimit (mbledhjen deponimin) të rrymës të energjisë dhe shfrytëzimin e rrymës gjatë orëve të nevojshme”, thekson Noshpall.
Kriza e energjisë, pavarësisht se ka zbehur efektet e saj në bursa, vijon të mbetet shtysa kryesore për biznesin për investimet në burime alternative.
Për këtë arsye, Ministria e Ekonomisë në vazhdimësi fton qytetarët dhe ndërmarrjet mikro, të vogla dhe të mesme, të aplikojnë për subvencionim në sisteme diellore për prodhimin e energjisë elektrike për vetëkonsum, të financuar nga Komisioni Evropian.
Por, amvisëritë dhe bizneset e vogla thonë se shumë vështirë arrihet deri te këto ndihma për shkak të procedurës së koklavitur me shumë burokraci./REL/
Lajme nga vendi
Këto janë rregullat e reja për hyrje në BE: Nuk do të ketë më vula në pasaporta, zbatimi nis në tetor
Komisioni Evropian ka njoftuar se më 12 tetor nis zbatimi gradual i Sistemit të ri të Hyrje-Daljes (EES) në vendet e zonës Shengen, i cili do të regjistrojë digjitalisht hyrjet dhe daljet e shtetasve nga vendet e treta për qëndrime afatshkurtra në 29 vende evropiane.
Sistemi i ri do të zëvendësojë vulosjen e pasaportave dhe do të mbledh të dhëna biometrike si gjurmët e gishtërinjve dhe fotografinë e fytyrës, duke synuar të përmirësojë kontrollin e kufijve të jashtëm të BE-së, të zbulojë tejkalimet e qëndrimit dhe abuzimet me identitetin.
Implementimi do të zgjasë gjashtë muaj, gjatë të cilëve policia kufitare do të nisë regjistrimin e udhëtarëve jo-BE në të gjitha vendet Shengen.
Nga tetori 2025, EES do të funksionojë plotësisht, duke regjistruar automatikisht çdo hyrje/dalje përmes skanimit dhe të dhënave biometrike.
Çfarë është ETIAS dhe kush e duhet?
EES është pjesë e paketës “Kufijtë inteligjentë” të BE-së, së bashku me ETIAS – Sistemin Evropian për Autorizim të Udhëtimit, i cili kërkohet për udhëtarët nga 59 vende që nuk kanë nevojë për vizë për të hyrë në Shengen (SHBA, Kanada, Britani, Australi, Serbia, etj.).
Nuk është vizë, aplikimi bëhet online, pa shkuar në ambasadë dhe pa dhënë të dhëna biometrike.
Miratimi vlen për 3 vite ose deri në skadimin e pasaportës.
Për moshat nën 18 vjeç dhe mbi 70 vjeç – është falas.
Nga fundi i vitit 2026, çmimi i aplikimit do të rritet nga 7 € në 20 €, për shkak të kostove të larta për infrastrukturën digjitale dhe sigurinë kibernetike. Synimi i BE-së: më shumë siguri në kufij, identifikim më i shpejtë i udhëtarëve dhe procedura më moderne e kontrollit.(INA)
Lajme nga vendi
Mickoski dënon thirrjet ksenofobike dhe anti-shqiptare në Kumanovë: Çdo incident i tillë do të hetohet dhe ndëshkohet
Kryeministri i Maqedonisë së Veriut, Hristijan Mickoski, ka dënuar ashpër thirrjet ksenofobike dhe anti-shqiptare që janë dëgjuar gjatë ndeshjes së basketbollit mes Maqedonisë dhe Bullgarisë, të zhvilluar në Kumanovë.
Mickoski theksoi se bëhet fjalë për një grup të vogël personash, të cilët, sipas tij, nuk kanë pasur përkrahje nga të pranishmit në sallë.
Ai tha se gjatë kohës që ndodhej aty, nuk i kishte vërejtur këto thirrje, por megjithatë shprehu qëndrim të qartë kundër çdo forme të nacionalizmit dhe urrejtjes etnike.
“Për të qenë i sinqertë, përderisa isha aty, as që i vura re këto brohoritje, sepse bëhej fjalë për një grup të vogël. Megjithatë, dënoj fuqishëm çdo formë nacionalizmi dhe ksenofobie – jo vetëm në këtë ndeshje, por edhe në përballjen mes Maqedonisë dhe Rumanisë. U bëj thirrje tifo-grupeve që të përkrahin ekipin e tyre në mënyrë sportive, me dinjitet dhe respekt për kombëtaren tonë,” tha Mickoski.
Ai shtoi se Qeveria e tij nuk do të tolerojë sjellje të tilla dhe se çdo incident i kësaj natyre do të jetë objekt hetimi dhe ndëshkimi, pavarësisht nga origjina apo përkatësia e autorëve.
“Edhe një herë e përsëris: absolutisht i dënoj sjelljet ksenofobike dhe brohoritjet nacionaliste të disa personave që nuk gjetën mbështetje nga asnjë prej të pranishmëve në sallë,” përfundoi Mickoski.
Kur do të përgjigjeni për Monstrën, Almirin, Lagjen e Trimave e Car Dushanin?
Bashkimi Demokratik për Integrim nuk mund të fshihet përgjithmonë pas fjalëve “patriotizëm”, “dinjitet” dhe “e ardhme”, duke lënë pas tragjedi të pandëshkuara, afera të pazgjidhura dhe pasurim imoral.
Sot, VLEN i bën publikisht pyetje BDI-së:
A është patriotizëm të heshtësh për Monstrën, ku shqiptarët u shpallën terroristë pa prova?
A është patriotizëm të mos japësh dorëheqjen pas ngjarjeve në Lagjen e Trimave, ku 10 shqiptarë u vranë në një aksion të dyshimtë policor?
A është patriotizëm të injorosh rastin Alfa, ku shqiptarët u dënuan në një proces që i ngjan një montimi klasik?
A është patriotizëm heshtja për vrasjen e Almirit të vogël, ku gjykata e quajti “aksident trafiku”, dhe ju nga BDI heshtnit?
A është patriotizëm enciklopedia që qeveria juaj e shtypi?
A është patriotizëm që i lejuat fëmijët të mësonin nga librat shkollorë me histori të shtrembëruar shqiptare?
A është patriotizëm Shkupi 2014, pa asnjë element shqiptar?
A është patriotizëm monumenti i Car Dushanit përpara Sheshit?
A është patriotizëm tragjedia me spitalin modular, pa asnjë dorëheqje?
A është patriotizëm Durmo Tours dhe Besa Trans, ku vdiqën dhjetëra e dhjetëra shqiptarë, pa drejtësi, pa llogaridhënie?
A është patriotizëm fakti që Artan Grubi është në listën e zezë të SHBA-së, për shkak se është i lidhur me njerëz që përndoqën dhe maltretuan shqiptarët?
BDI nuk duhet të largohet më nga këto pyetje.
Shqiptarët nuk e meritojnë një parti që ndërton pronën, karrierën dhe të ardhmen e saj në kurriz të tragjedive të tyre.
BDI duhet të përgjigjet:
A është injorimi i këtyre problemeve përkufizimi i tyre i patriotizmit?
A është pasurimi personal vizioni i tyre i dinjitetit?
A është heshtja përgjigja e tyre ndaj dhimbjes së popullit?
Koha e heshtjeve ka mbaruar.
Tani është koha për përgjegjësi, llogaridhënie dhe drejtësi.
Shqiptarët nuk janë vegla për kolltukët e dikujt, ata janë një popull që meriton të vërtetën dhe një të ardhme.
VLEN
Këto janë rregullat e reja për hyrje në BE: Nuk do të ketë më vula në pasaporta, zbatimi nis në tetor
Mickoski dënon thirrjet ksenofobike dhe anti-shqiptare në Kumanovë: Çdo incident i tillë do të hetohet dhe ndëshkohet
VLEN: Kur do të përgjigjeni për Monstrën, Almirin, Lagjen e Trimave e Car Dushanin?
Zyra e Avokatit të Popullit në Tetovë sot do të jetë e hapur
Nesër në Maqedoni do të shpallet gjendje krize në energjetikë, nga 1 shtatori hyjnë në fuqi masat për kursim
Kovaçevski paralajmëroi drejtor të ri të Drejtorisë për Zbatimin e Sanksioneve
Visar Ganiu ua uron Kurban Bajramin: Ju uroj që kjo festë e shenjtë t’ju sjellë paqe në zemër | VIDEO
Aksident tragjik në autostradën Tetovë – Gostivar, humb jetën një grua 33 vjeçare | VIDEO
Shkup, panairi i patundshmërive të Dubait! Citi Casa rikthehet në hapësirat e COWORK21 më 31 maj dhe 1 qershor
-
Lajme nga vendi3 years ago
Zyra e Avokatit të Popullit në Tetovë sot do të jetë e hapur
-
Lajme nga vendi3 years ago
Nesër në Maqedoni do të shpallet gjendje krize në energjetikë, nga 1 shtatori hyjnë në fuqi masat për kursim
-
Lajme nga vendi3 years ago
Kovaçevski paralajmëroi drejtor të ri të Drejtorisë për Zbatimin e Sanksioneve