Një tifoz sllovak mbrëmjen e djeshme u arrestua në Aeroportin e Shkupit për sjellje agresive gjatë fluturimit nga Sllovakia, ndërsa 10 të tjerëve nuk u lejua hyrja në vend për arsye sigurie, përcjell TV21. Nga Policia njoftojnë se ndaj personit L.T. do të dorëzohet kallëzim përkatës.

“Më 10.12.2025 rreth orës 20:30, në SPB-Shkup, shërbimet e Aeroportit Ndërkombëtar të Shkupit dhe Qendra Rajonale për Punë Kufitare Veri raportuan se në një aeroplan që vinte nga Sllovakia, disa persona nën ndikimin e alkoolit, pjesë të një grupi tifozësh, nuk respektonin rregullat gjatë fluturimit dhe pas uljes, silleshin në mënyrë agresive dhe shqetësonin pasagjerët e tjerë dhe ekuipazhin. Policët mbërritën menjëherë në vendngjarje dhe pas marrjes së masave arrestuan L.T. (38) nga Sllovakia, ndërsa 10 persona të tjerë, gjithashtu nga Sllovakia, nuk u lejuan të hynin në vend për arsye sigurie. Pas dokumentimit të plotë të rastit, kundër L.T. do të dorëzohet kallëzim përkatës”, thonë nga MPB.

Gjykimi për tragjedinë në Koçan, ku humbën jetën 63 persona dhe u plagosën mbi 200 të tjerë, do të vazhdojë sot me fjalët hyrëse nga mbrojtja e të pandehurit të 26-të, Shefket Haziri nga Ministria e Ekonomisë. Ndërkohë në seancën e djeshme mbrojtja e të pandehurve, ish-ministra të ekonomisë dhe drejtorë të Drejtorisë për Mbrojtje dhe Shpëtim (DMSH), mohoi fajësinë dhe kontestoi aktakuzën, duke pretenduar se nuk kishin as autoritet ligjor dhe as fuqi faktike për të ndikuar në rezultatin tragjik të zjarrit, të shkaktuar nga piroteknika të papërshtatshme për një dhomë të mbyllur dhe të përdorura në kundërshtim me ligjin për piroteknikën.

Drejtori i Shërbimit për Punë të Përgjithshme dhe të Përbashkëta (SHPPP) i Qeverisë, Ivica Tomovski, njofton se targat e reja të kuqe për automjetet zyrtare u testuan përmes sistemit “Safe City” para futjes së tyre, pas së cilës filloi përpunimi i tyre.

Tomovski për “Sitel” thotë se kanë vënë re një problem, mesazhet për shkeljet e regjistruara nga sistemi i kamerave “Safe City” po arrijnë te kompanitë e lizingut nga të cilat Qeveria bleu automjetet, prandaj disa nga gjobat kalojnë përmes tyre te SHPPP.

“Vlerësoj se personi që ka kryer shkeljen duhet të paguajë, jo kompania”, tha ai, duke njoftuar se ndryshimet ligjore janë të mundshme.

Lidhur me futjen e mundshme të një sistemi GPS për gjurmimin satelitor në automjetet zyrtare, Tomovski tha se do të presin për të parë nëse do të jetë e nevojshme, pasi të analizojnë rezultatet e “Safe City”.