Lajme nga vendi
Një epokë e re në Zürich: Omer Xhemali emërohet drejtor i Klinikës Universitare të Kardiokirurgjisë
Mjeku i njohur shqiptar, Omer Xhemali, është emëruar drejtor i Klinikës Universitare të Kardiokirurgjisë në Zürich. Ky është njëri ndër postet më të rëndësishme në kardiokirurgjinë evropiane. Portret i një mjeku që si gjimnazist përjetoi zymtësinë e shtypjes së shqiptarëve në Maqedoni, si student i shpëtoi luftës në Sarajevën e rrethuar, pastaj – në Gjermani – shkëlqeu si student, kardiokirurg dhe shkencëtar. Dhe një ditë erdhi në Zürich…
Rrëfimi i parë
Befasisht në një ditë pranvere, vite më parë, ra muhabeti për Tetovën. Në hotel “Evropa” në Sarajevë takova një ish-politikan, gazetar, publicist dhe pasardhës të një familjeje fisnike boshnjake. Në fund të viteve ‘80, në prag të shembjes së Jugosllavisë, boshnjaku ishte politikan liberal. Kur në horizont po dukej shtrëngata e luftërave të ardhshme, ai – si funksionar shtetëror – vizitoi Tetovën. «Shkova me një delegacion për të parë si është gjendja atje. Më parë qëndrova në Prishtinë, ku nacionalizmi serb kishte marrë hov të madh. Në Tetovë vizituam një ndërmarrje shtetërore, pastaj funksionarët lokalë na shtruan drekë. Aty më ra në sy një anomali: shqiptarët mund të punonin vetëm si kamerierë. Ata na sillnin ushqimin, pije dhe kafetë, ndërsa ne flisnim për politikë. Kur i pyeta liderët lokalë komunistë se ku janë shqiptarët, ata rrudhën supet».
Rrëfimi i dytë
Afërsisht në atë kohë kur politikani nga Sarajeva vizitoi Tetovën, prindërit e gjimnazistit Omer Xhemali, të dy arsimtarë në rrethinën e Tetovës, po e ndiqnin një ëndërr: dëshironin ta regjistronin djalin e tyre në Fakultetin e Mjekësisë në Shkup. Një ditë njëri nga vendimmarrësit në universitet i tha babait të Omer Xhemalit se djalin mund ta regjistronte nëse «do të jepte diçka». Për shembull një veturë Golf, njërën nga ato që atëbotë prodhonte Fabrika e Veturave në Sarajevë (TAS). «Jam arsimtar dhe nuk kam para për dhurata të tilla», u përgjigj prindi i shqetësuar. Refuzoi të japë ryshfet dhe doli nga zyra.
Rrëfimi i tretë
Në prag të shpërbërjes së Jugosllavisë, Omer Xhemali u nis për në Sarajevë, ku filloi studimet për mjekësi. Nëpër qytet jehonin njëkohësisht kërcënimet me luftë të psikiatrit të çmendur, Radovan Karaxhiq, dhe klithmat e mijëra qytetarëve kundër luftës. Pas fjalëve u shkrepën plumbat e parë, u vranë civilët e parë, forcat serbe filluan të hapin istikamet e para në kodrat përreth Sarajevës. Së shpejti do të fillonte rrethimi i Sarajevës, më i gjati rrethim i një qyteti në historinë bashkëkohore. Rreth 11 mijë të vrarë, mes tyre qindra fëmijë. Ky është bilanci i përgjakshëm i forcave serbe vetëm në Sarajevë. Omer Xhemali i shpëtoi tmerrit dhe pas një odiseje disaditore të ikjes nga qyteti, arriti në Aeroportin e Sarajevës. E braktisi kryeqytetin e Bosnjë-Hercegovinës me një avion të mbushur dëng me njerëz. «S’kishte vend për t’u ulur dhe qëndrova në këmbë gjatë fluturimit», tregon ai sot.
Lajmi i madh
Të enjten, Spitali Universitar i Zürichut ka njoftuar se Omer Xhemali është emëruar drejtor i Klinikës Universitare të Kardiokirurgjisë në Zürich dhe ligjërues i së njëjtës lëndë në Universitetin e Zürichut. Ky është njëri ndër postet më të rëndësishme në kardiokirurgjinë evropiane. Deri më tani Xhemali ka punuar si drejtor i Klinikës së Zemrës në Spitalin e Qytetit të Zürichut (Triemli). Që nga viti 2016 ai ka qenë i angazhuar edhe në Spitalin Universitar të Zürichut dhe e njeh mirë punën e klinikës së zemrës. Ky është një parakusht i shkëlqyeshëm që në të ardhmen të dyja klinikat e zemrës të bashkëpunojnë edhe më ngushtë në rritjen e efikasitetit dhe shërbimeve ndaj pacientëve, thuhet në një komunikatë të Spitalit Universitar të Zürichut. Se me çfarë profesionalizmi dhe përkushtimi Omer Xhemali e kryen punën jashtëzakonisht të përgjegjshme të kirurgut të zemrës, ndoshta mjafton ky shembull: me një rast, ndërsa po festonim ditëlindjen e tij, mes mysafirëve u shfaq edhe një zviceran që kishte bërë tatuazh emrin e Omer Xhemalit – një gjest i pazakontë falënderimi për operacionin e suksesshëm.
Rruga deri këtu
Nga Sarajeva Omer Xhemali vajti në Mainz të Gjermanisë, ku mes viteve 1993-2000 studioi mjekësinë në Universitetin Johannes Gutenberg. Për të gjetur një vend për të studiuar, ai zhvilloi një betejë titanike dhe në fund i punoi pak edhe fati. «Si student kam punuar kamerier dhe sot kur shoh njerëz që sillen keq me kamerierë, u them: kujdes se nesër ky mund të ta operojë zemrën. Andaj silluni mirë me kamerierë». Në vitin 2000 Omer Xhemali promovoi dhe mori titullin doktor i mjekësisë. Deri në vitin 2009 ai në Universitetin Johann-Wolfgang-Goethe të Frankfurtit kaloi rrugën klasike të përparimit në karrierë: mjek asistent, specialist, kryemjek, pastaj habilitoi në fushën e kirurgjisë së zemrës. Habilitimi në Gjermani dhe në disa vende të tjera evropiane është provimi i nivelit më të lartë përmes të cilit fitohet e drejta për të ligjëruar në universitet. Po atë vit, Omer Xhemali mori titullin «docent privat» dhe rrjedhimisht autorizimin për të ligjëruar. Dhe po atë vit bëri një hap tjetër të rëndësishëm në karrierë: u punësua si zëvendësdrejtor i Klinikës së Zemrës në Spitalin e Qytetit të Zürichut (Triemli). Që nga viti 2009 kjo klinikë është bërë ndër më të suksesshmet në Zvicër – dhe meritat kryesore i ka Omer Xhemali, i cili ka kryer me qindra operacione të suksesshme. Nga viti 2018 ai është shef i Klinikës së Zemrës në Spitalin e Qytetit të Zürichut (Triemli).
Paraardhësit në Zürich
Për të kuptuar rëndësinë e postit që do të ushtrojë Omer Xhemali në Zürich, duhet shikuar pak në histori dhe në biografitë e paraardhësve të tij në Klinikën Universitare të Kardiokirurgjisë në Zürich. Në vitin 1961 në Zürich erdhi kirurgu i famshëm suedez Åke Senning. Vite më parë Senning kishte zbuluar bashkë me mentorin e tij të kirurgjisë Clarence Crafoord makinën e parë për qarkullim ekstrakorporal, domethënë një makinë që e zëvendëson funksionin e zemrës dhe mushkërive. Me ndihmën e kësaj makine Crafoord më 1954 kreu operacionin e parë në zemër të hapur në Evropë. Në Klinikën e Kirurgjisë të Spitalit Universitar në Zürich, Åke Senning më 1969 kreu dy transplantimet e para të zemrës në Zvicër. Senning ishte një vizionar i madh. Që më 1958 ai zbuloi, bashkë me një inxhinier të elektroteknikës, pejsmejkerin e implantueshëm të zemrës. Specialistë të tjerë të njohur të zemrës në Zürich kanë qenë edhe gjermani Andreas Roland Grüntzig dhe kroati Marko Turina.
Çka është zemra?
Një poet romantik zemrën do ta përshkruante si një organ që fluturon në qiell ose dhemb kur bartësi i zemrës dashurohet ose vuan nga ndonjë hall tjetër. Mjekët si Omer Xhemali kanë një shpjegim tjetër, teknik dhe ironik. «Zemra është një pompë shumë efikase. Gjatë një dite ajo rrah afërsisht 86 mijë herë, 30 milionë herë gjatë vitit ose rreth 2,4 miliardë herë në jetën e një 80-vjeçari», shpjegon Omer Xhemali në zyrën e tij. Në mur mban të varur një portret të bukur të Nënë Terezës. Ndodh shpesh që pacientët, pas operacionit, të dërgojnë ndonjë letër. Falënderime të zakonshme. Por nganjëherë disa pacientë shkruajnë perla pothuaj letrare. Njëri prej tyre kështu e përshkruan rrugën drejt sallës së operacionit ku e pret Omer Xhemali: përshëndetje dhe inkurajim nga personeli, një batanije e ngrohtë, tani mendoni diçka të bukur, lidhja me aparatet mjekësore, një koreografi profesionale, të gjithë në lëvizje si të ishin valltarë e valltare të Baletit «Liqeni i Mjellmave» të Pjotër Iliq Çajkovskit. Në letrën falënderuese pacienti e prezanton veten si «njeri të teatrit» dhe fjalive të tij ua shton nga një vepër muzikore. «Lajmi se zemra ime duhet t’i nënshtrohet një operacioni të madh, ishte tronditës, truri im ndihej si uvertura e ‹Zogut të zjarrtë› të Igor Stravinskit». Pritjen mes diagnozës dhe konsultimit të parë pacienti e përjeton si dimrin te «Katër stinët» e Antonio Vivaldit. Dhe kështu me radhë, deri pas operacionit, kur i kthehet jetës normale. Një operacion zemre si lojë baleti? Si në lojën në skenë edhe në ndërhyrjen me vegla mjekësore në sallën e operacionit, çdo lëvizje është e rëndësishme. Por ka një dallim: mjeshtri i baletit mund të gabojë në skenë dhe të shkaktojë të qeshura në publik. Po gaboi kirurgu i zemrës, askush nuk qesh. Mund të thuhet se profesioni i dytë i Omer Xhemalit është: dhurues buzëqeshjesh jo vetëm për paciente e pacientë, por edhe për rrethin e tyre familjar.
Rrëfimi për gjyshen
Në njërën nga bisedat e shumta, e pyeta Omer Xhemalin nëse ka qenë nxënës shembullor. Ekziston një mit sipas të cilit mjekët që nga dita e parë në shkollë janë nxënës shembullor. Ai u përgjigj: «Çka domethënë nxënës shembullor? Me nota po, me këto të tjerat…». Omer Xhemali tregon se momenti kur vendosi të bëhej mjek ishte kur sapo kishte mbushur 9 vjet. «Më vdiq gjyshja nga zemra dhe ishte e dhimbshme të shohësh familjen e cila e kishte të pamundur t’i ndihmonte». Pyetja e radhës: si kirurg i zemrës ju punoni në vijën ndarëse mes jetës dhe vdekjes. Si jeni ndier kur para vetes keni pasur një zemër që duhej ta operonit? «Kisha frikë në mos gaboj, kisha dyshime a do t’i bëj të gjithë hapat e duhur. Ka qenë operacioni i parë që e kam kryer si përgjegjës i vetëm. Në vitin 2003». E si është sot puna me frikën? «S’kam frikë. Çfarë u them asistentëve të mi është kjo: s’ka vend për frikë në kirurgjinë e zemrës. Por duhet të ketë vend për shumë respekt». Si ndiheni pas operacionit të suksesshëm? «I gëzuar, i lumtur dhe me plot motivim për operacionin e ardhshëm». Në rast se pacienti vdes… «I pikëlluar, i thelluar në mendime – dhe prapë i vendosur të trajtojë pacientin e radhës».
Në Shkup, në Tetovë
Çdo rreth një ditë mbyllet. Pasi u punësua në Zürich, Fakulteti i Mjekësisë i Universitetit të Shkupit e luti Omer Xhemalin të mbajë një ligjëratë në kryeqytetin maqedonas. E pranoi ftesën dhe ligjëratën e nisi me këto fjalë: «Gëzohem që kam rastin të mbaj një ligjëratë në Universitetin ku nuk më pranuan për arsye politike». Disa nga të pranishmit ulën kokën. Më 2014 u emërua në Shkup profesor ekstraordinar, më 2015 Universiteti Shtetëror i Tetovës e nderoi me titullin «Doctor honoris causa» dhe më 2016 po ky institucion i dijes e emëroi profesor të rregullt universitar. Çdo rreth një ditë mbyllet: karriera e Omer Xhemalit është edhe një shembull se historia nuk është statike, ajo ndryshon kur njerëzit duan ta ndryshojnë. Nga mesi i viteve ‘90 në Tetovë forcat maqedonase vranë njerëz vetëm pse kërkonin arsimim universitar. Në vitin 2022 shqiptarët në Maqedoni kanë tri universitete. Dhe ai gjimnazisti që para mbi tri dekadave nuk u regjistrua në Fakultetin e Mjekësisë në Shkup, në fund të këtij viti do të marrë drejtimin e Klinikës Universitare të Kardiokirurgjisë në Zürich. Ky emërim është, po ashtu, një sinjal i radhës i evolucionit të pandalshëm dhe pozitiv të diasporës shqiptare në Zvicër. C’est la vie!/koha.net/arberi/
Lajme nga vendi
Jozyrtarisht ky është draft-ligji për përfaqësim të drejtë, vlerësuar pozitivisht nga Venecia (DOKUMENT)
Iliria News Agency (INA) ka siguruar versionin e draft-ligjit për Përfaqësim Adekuat dhe të Drejtë, të dorëzuar nga Qeveria e Republikës së Maqedonisë së Veriut në Komisionin e Venecias.
Drafti ka marrë vlerësim pozitiv nga ekspertët ndërkombëtarë, duke theksuar rëndësinë e tij për garantimin e përfaqësimit të barabartë të të gjitha komuniteteve në institucionet publike dhe organet shtetërore.
Ky draft-ligj siç thuhet ka për qëllim të sigurojë:
Përfaqësim proporcional të qytetarëve sipas të dhënave të fundit të regjistrimit të popullsisë;
Trajtim të drejtë dhe mundësi të barabarta për të gjithë qytetarët në punësim dhe avancim në administratën publike;
Monitorim dhe analiza të vazhdueshme për të garantuar barazinë dhe përfshirjen e komuniteteve;
Krijimin e mekanizmave institucionalë për të përmirësuar përfaqësimin e komuniteteve të nën-përfaqësuara.
Draft-ligji është përgatitur duke respektuar parimet kushtetuese, standardet ndërkombëtare dhe synon të forcojë kohezionin social dhe përfshirjen qytetare në nivelin qendror dhe lokal, përcjell INA. Për këtë projekt-ligj që pritet të marrë dritë jeshile në Kuvend, pritet të hapet debat parlamentar por edhe në opinionin publik.
Më poshtë gjendet projekt-ligji i plotë në shqip, i përkthyer nga versioni i Komisionit të Venecias, ndërsa në link teksti origjinal KËTU:
PROJEKT-LIGJI PËR PËRFAQËSIM ADEKUAT DHE TË DREJTË
(Përkthim profesional nga versioni anglisht i CDL-REF(2025)037)
Lënda e rregullimit
Neni 1
(1) Me këtë ligj rregullohet respektimi, afirmimi, promovimi dhe monitorimi i përfaqësimit adekuat dhe të drejtë të qytetarëve që u përkasin të gjitha komuniteteve në organet e pushtetit shtetëror dhe në institucionet e tjera publike në të gjitha nivelet, si vlerë themelore e rendit kushtetues të Republikës së Maqedonisë së Veriut.
Përkufizime
Neni 2
(1) Për qëllimet e këtij ligji, termat e mëposhtëm kanë kuptimin si vijon:
Përfaqësim adekuat është përfaqësimi i qytetarëve që u përkasin të gjitha komuniteteve në organet e pushtetit shtetëror dhe institucionet e tjera publike në të gjitha nivelet, i cili përafërsisht pasqyron pjesëmarrjen e tyre në popullsi, sipas të dhënave të regjistrimit të fundit të popullsisë.
Përfaqësim i drejtë është përfaqësimi i qytetarëve që u përkasin të gjitha komuniteteve në organet e pushtetit shtetëror dhe institucionet e tjera publike në të gjitha nivelet, duke siguruar trajtim të drejtë dhe mundësi të barabarta për të gjithë qytetarët, me respektimin e rregullave të kompetencës dhe integritetit që rregullojnë administratën publike.
Qëllimet
Neni 3
(1) Qëllimi i këtij ligji është respektimi, afirmimi dhe promovimi i përfaqësimit adekuat dhe të drejtë të qytetarëve që u përkasin të gjitha komuniteteve në organet e pushtetit shtetëror dhe institucionet e tjera publike në të gjitha nivelet.
(2) Ky ligj siguron qasje të barabartë në punësim dhe avancim në punë, pjesëmarrje dhe përfaqësim të qytetarëve në organet e pushtetit shtetëror dhe institucionet e tjera publike në të gjitha nivelet, si dhe nxit përfshirjen dhe forcimin e kohezionit shoqëror përmes vendosjes së mekanizmave institucionalë dhe proceduralë.
Fusha e zbatimit
Neni 4
(1) Respektimi, afirmimi, promovimi dhe monitorimi i përfaqësimit adekuat dhe të drejtë të qytetarëve që u përkasin të gjitha komuniteteve, në përputhje me këtë ligj, zbatohet në organet e pushtetit shtetëror dhe institucionet e tjera publike në të gjitha nivelet.
Parimet
Neni 5
(1) Përfaqësimi adekuat dhe i drejtë, si vlerë themelore e rendit kushtetues, realizohet në përputhje me parimet e:
mosdiskriminimit dhe mundësive të barabarta;
meritës, profesionalizmit, kompetencës dhe integritetit;
transparencës dhe llogaridhënies në proceset e punësimit dhe avancimit;
përfshirjes dhe kohezionit shoqëror.
Deklarimi i lirë i përkatësisë
Neni 6
(1) Çdo qytetar ka të drejtë të deklarojë lirisht përkatësinë e tij ose të saj ndaj cilitdo komunitet në shtet. Kjo e drejtë ushtrohet individualisht ose së bashku me qytetarë të tjerë që u përkasin të njëjtit ose një komuniteti tjetër, pa asnjë formë detyrimi.
(2) Deklarimi i përkatësisë etnike është vullnetar.
(3) Qytetari ka të drejtë të mos deklarojë përkatësinë e tij ose të saj ndaj asnjë komuniteti. Mosdeklarimi nuk mund të ndikojë në ushtrimin e të drejtave dhe lirive të tij ose të saj, as në pozitën e tij ose të saj juridike.
(4) Deklarimi i lirë i përkatësisë së qytetarëve mund të kushtëzohet me kritere objektive me qëllim parandalimin e keqpërdorimit të deklarimit arbitrar.
Bazat për zbatimin e përfaqësimit adekuat dhe të drejtë
Neni 7
(1) Qytetarët që u përkasin të gjitha komuniteteve gëzojnë përfaqësim adekuat dhe të drejtë në organet e pushtetit shtetëror dhe institucionet e tjera publike, në të gjitha nivelet.
(2) Përfaqësimi sipas paragrafit (1) realizohet në bazë të rezultateve të regjistrimit të fundit të popullsisë, të drejtave të fituara dhe marrëveshjeve ndërkombëtare që janë pjesë përbërëse e rendit juridik të brendshëm, në përputhje me Kushtetutën.
(3) Respektimi i përfaqësimit adekuat dhe të drejtë duhet të sigurojë trajtim të barabartë për të gjithë qytetarët, pa diskriminim, dhe të zbatohet në përputhje me parimet e barazisë, meritës dhe kompetencës profesionale.
(4) Trajtimi preferencial për arritjen dhe promovimin e përfaqësimit adekuat dhe të drejtë të komuniteteve të nënpërfaqësuara, me qëllim sigurimin e barazisë efektive, nuk konsiderohet diskriminim.
Masat për sigurimin e përfaqësimit adekuat dhe të drejtë
Neni 8
(1) Organet shtetërore dhe institucionet e tjera publike, në të gjitha nivelet, në përputhje me Kushtetutën dhe ligjin, ndërmarrin masa për të siguruar barazi të plotë dhe efektive të qytetarëve, me qëllim respektimin, afirmimin, promovimin dhe mbrojtjen e përfaqësimit adekuat dhe të drejtë të qytetarëve që u përkasin të gjitha komuniteteve.
(2) Vëmendje e veçantë i kushtohet masave për përmirësimin e përfaqësimit të qytetarëve që u përkasin komuniteteve të nënpërfaqësuara në organet e pushtetit shtetëror dhe institucionet e sektorit publik.
Trupi koordinues për monitorimin e përfaqësimit adekuat dhe të drejtë
Neni 9
(1) Me qëllim monitorimin e gjendjes dhe promovimin e përfaqësimit adekuat dhe të drejtë, themelohet Trupi Koordinues për Zbatimin e Përfaqësimit Adekuat dhe të Drejtë të Qeverisë (në vijim: Trupi Koordinues).
(2) Trupi Koordinues funksionon në bashkëpunim me Agjencinë për Nëpunës Administrativë (në vijim: Agjencia).
(3) Përbërja e Trupit Koordinues përcaktohet nga Qeveria. Trupi drejtohet nga njëri prej zëvendëskryeministrave dhe përbëhet nga ministra, një përfaqësues i Agjencisë, një përfaqësues i Avokatit të Popullit, një përfaqësues i Komisionit për Parandalimin dhe Mbrojtjen nga Diskriminimi dhe një përfaqësues i komunitetit akademik.
(4) Organizimi dhe mënyra e punës së Trupit Koordinues rregullohen me akt të propozuar nga Trupi Koordinues dhe të miratuar nga Qeveria.
(5) Trupi Koordinues, me iniciativë të vet ose me propozim të një institucioni kompetent, mund të propozojë rishikimin e politikave, programeve dhe planeve për punësim dhe avancim në sektorin publik, me qëllim përmirësimin e përfaqësimit.
(6) Trupi Koordinues monitoron dhe vlerëson zbatimin e të drejtave të qytetarëve që u përkasin të gjitha komuniteteve, si dhe gjendjen e marrëdhënieve ndëretnike në sektorin publik, dhe në këtë bazë propozon masa për promovimin e barazisë, përfshirjes dhe efikasitetit të administratës publike.
Monitorimi dhe analiza e gjendjes lidhur me përfaqësimin adekuat dhe të drejtë
Neni 10
(1) Trupi Koordinues, në bashkëpunim me Agjencinë, monitoron dhe analizon rregullisht zbatimin e masave dhe aktiviteteve për sigurimin e përfaqësimit adekuat dhe të drejtë dhe përgatit raport të paktën një herë në vit, i cili i paraqitet Qeverisë.
(2) Me kërkesë të Trupit Koordinues, të gjitha organet kompetente janë të detyruara që brenda 30 ditëve nga marrja e kërkesës të dorëzojnë të dhëna dhe informacione lidhur me gjendjen e përfaqësimit.
(3) Të dhënat dhe informacionet përfshijnë veçanërisht:
të dhëna statistikore mbi përfaqësimin;
të dhëna nga regjistri i të punësuarve në sektorin publik;
të dhëna për masat e zbatuara dhe nivelin e zbatimit të tyre;
informacione mbi vështirësitë në zbatim;
shpenzimet financiare vjetore;
masat dhe shpenzimet e planifikuara për vitin e ardhshëm fiskal;
dhe informacione të tjera.
(4) Gjatë përpunimit dhe dorëzimit të të dhënave personale respektohen dispozitat e Ligjit për Mbrojtjen e të Dhënave Personale.
(5) Në rast të mosdorëzimit të të dhënave brenda afatit, Trupi Koordinues e njofton Qeverinë me raport të veçantë.
Planifikimi i punësimit
Neni 11
(1) Agjencia, në bashkëpunim me Trupin Koordinues, miraton metodologji për planifikimin e punësimit në sektorin publik në përputhje me parimin e përfaqësimit adekuat dhe të drejtë.
(2) Gjatë planifikimit vjetor të punësimit, institucionet publike janë të detyruara të marrin parasysh planin e shpërndarjes së punësimeve të reja, të përgatitur sipas metodologjisë.
(3) Shpërndarja bazohet në përqindjen e përfaqësimit të të punësuarve në fillim të vitit kalendarik, duke marrë parasysh të dhënat e regjistrimit të fundit të popullsisë dhe përfaqësimin në nivel qendror dhe/ose lokal.
(4) Nëse konstatohet mbipërfaqësim i një komuniteti, Trupi Koordinues propozon masa për rishpërndarjen e punësimeve të reja. Në institucionet ku përfaqësimi adekuat është arritur ose tejkaluar, nuk planifikohen punësime të reja mbi këtë bazë për aq kohë sa kjo gjendje vazhdon.
Ngritja e ndërgjegjësimit publik
Neni 12
(1) Institucionet e sektorit publik ndërmarrin aktivitete për ngritjen e ndërgjegjësimit publik, promovimin e edukimit dhe zhvillimit profesional lidhur me zbatimin e parimit të përfaqësimit adekuat dhe të drejtë.
(2) Këto aktivitete mund të përfshijnë trajnime, fushata publike, seminare, konsultime, mbështetje për përgatitjen e akteve të brendshme, udhëzime dhe forma të tjera edukimi dhe informimi.
(3) Trupi Koordinues, përmes raportit vjetor drejtuar Qeverisë, paraqet edhe informacion mbi aktivitetet e ndërmarra dhe rekomandime për përmirësim.
(4) Mjetet financiare sigurohen nga buxhetet e institucioneve kompetente dhe nga burime të tjera në përputhje me ligjin.
Promovimi dhe edukimi
Neni 13
(1) Institucionet e sektorit publik, brenda kapaciteteve dhe kompetencave të tyre, inkurajojnë pjesëmarrjen e të punësuarve nga të gjitha komunitetet në programe arsimimi, trajnimi dhe zhvillimi profesional, me qëllim përmirësimin e kompetencave dhe zbatimin e parimit të përfaqësimit adekuat dhe të drejtë.
Dispozita kalimtare dhe përfundimtare
Neni 14
(1) Aktet nënligjore të parashikuara me këtë ligj miratohen brenda gjashtë muajve nga hyrja në fuqi e tij.
(2) Qeveria, brenda gjashtë muajve nga hyrja në fuqi e këtij ligji, përgatit rishikimin e të gjitha ligjeve që përmbajnë dispozita lidhur me përfaqësimin adekuat dhe të drejtë dhe paraqet propozime për harmonizimin e tyre.
Hyrja në fuqi
Neni 15
(1) Ky ligj hyn në fuqi ditën e tetë nga data e publikimit në “Fletoren Zyrtare të Republikës së Maqedonisë së Veriut”.
Moti sot me diell dhe me vranësira të vogla deri në mesatare. Në orët e mëngjesit në disa vende do të ketë paraqitje të mjegullës. Do të fryjë erë e dobët deri në mesatare nga drejtimi veriperëndimorë. Temperatura minimale do të jetë në interval prej -6 deri në 0, ndërsa ajo maksimale do të arrij nga 9 deri në 13 gradë.
Në Shkup paradite në disa pjesë të luginës do të ketë paraqitje të mjegullës. Gjatë ditës moti do të jetë me diell. Temperatura minimale do të ulet në -5, ndërsa ajo maksimale do të arrij në 9 gradë Celsiusë.
Lajme nga vendi
Konfiskohen vegla pune dhe rroba në dy raste të ndryshme në autostradën Tabanoc–Kumanovë
Nga Ministria e Punëve të Brendshme njoftojnë se gjatë ditës së djeshme, në autostradën Tabanoc–Kumanovë, në dy raste të ndara, kanë privuar nga liria B.I. (38) nga Kumanova dhe B.S. (41) nga Shkupi.
Fillimisht, nëpunësit policorë ndaluan një automjet pasagjerësh të tipit “Golf”, me targa të Kumanovës, të drejtuar nga B.I. Gjatë kontrollit të automjetit u gjetën 272 copë mallra të ndryshme të brenduara, pa dokumentacion përkatës. Mallrat u sekuestruan, ndërsa personi u privua nga liria.
MPB njofton se në rastin e dytë, nëpunësit policorë ndaluan një automjet pasagjerësh të tipit “Mercedes”, me targa të Shkupit, të drejtuar nga B.S. Gjatë kontrollit të automjetit u gjetën 174 copë vegla të ndryshme pune, elektrike dhe me bateri, gjithashtu pa dokumentacion. Automjeti dhe veglat u sekuestruan, ndërsa personi u privua nga liria.
Pas dokumentimit të plotë të rasteve, do të parashtrohen kallëzimet përkatëse.
S’ka paqe për Australinë! Sulm vandal në varrezat myslimane, gjenden koka të prera…
Sulmuesi nga Sidney është pjesë e klubit serb të gjuetisë “Zastava”
Jozyrtarisht ky është draft-ligji për përfaqësim të drejtë, vlerësuar pozitivisht nga Venecia (DOKUMENT)
Zyra e Avokatit të Popullit në Tetovë sot do të jetë e hapur
Nesër në Maqedoni do të shpallet gjendje krize në energjetikë, nga 1 shtatori hyjnë në fuqi masat për kursim
Kovaçevski paralajmëroi drejtor të ri të Drejtorisë për Zbatimin e Sanksioneve
Visar Ganiu ua uron Kurban Bajramin: Ju uroj që kjo festë e shenjtë t’ju sjellë paqe në zemër | VIDEO
Aksident tragjik në autostradën Tetovë – Gostivar, humb jetën një grua 33 vjeçare | VIDEO
Shkup, panairi i patundshmërive të Dubait! Citi Casa rikthehet në hapësirat e COWORK21 më 31 maj dhe 1 qershor
-
Lajme nga vendi2 months agoBilall Kasami : Mega projekti që po bëhet realitet investim prej 70 milionë denarëve Tetova po transformohet
-
Lajme nga vendi1 month agoUniversiteti i Tetovës shpreh ngushëllime për vdekjen e studentes Daorsa Spahija
-
Lajme nga vendi2 months agoEdhe LSDM del me vlerësimet e saj: Me këtë rezultat, VMRO-DPMNE do të kishte 52 deputetë, kurse ne 21
You must be logged in to post a comment Login