Ish-drejtoresha ekonomike e Klinikës për Toksikologji, Besija Iljazi, me vendim të Gjykatës Themelore në Tetovë është e obliguar t’ia kthejë Klinikës paratë e paguara për 17 honoraristë të angazhuar në mënyrë të paligjshme.

Sipas aktgjykimit, ajo duhet të kompensojë dëm material në shumën prej 659.831 denarësh, që është rreth 10.700 euro. Shuma është përcaktuar pas ekspertizës së një eksperti ekonomik. Kërkesa për dëm jomaterial është tërhequr, pasi Iljazi është pajtuar t’i mbulojë të gjitha shpenzimet e procedurës.

Iljazi më herët pranoi fajësinë për veprën penale “keqpërdorim i pozitës dhe autorizimit zyrtar”. Ajo u dënua me kusht me dy vite burg me mbikëqyrje mbrojtëse, dënim që nuk do të ekzekutohet nëse brenda katër viteve nuk kryen vepër tjetër penale. Përveç kësaj, i është caktuar edhe program individual probacioni dhe plan për mbikëqyrje.

Sipas aktakuzës, në maj të vitit 2024, në periudhë parazgjedhore, ajo kishte lidhur kontrata në vepër me 17 persona, në kundërshtim me Kodin Zgjedhor, Ligjin për Parandalimin e Korrupsionit dhe Ligjin për Mbrojtje Shëndetësore. Disa pagesa ishin bërë në mënyrë retroaktive, ndërsa në listë ishin përfshirë edhe persona me të cilët nuk ishte lidhur fare kontratë. Në këtë mënyrë, buxheti i Klinikës ishte dëmtuar, ndërsa personave të angazhuar u ishte mundësuar përfitim i kundërligjshëm pasuror.

Rasti shkaktoi reagime të shumta publike. Në atë kohë, drejtori mjekësor i Klinikës, dr. Danil Petrovski, kishte refuzuar t’i nënshkruajë angazhimet, duke theksuar se bëhej fjalë për periudhë parazgjedhore.

Advertisement

Kolegiumi profesional i Klinikës kishte alarmuar se, në vend të administratës shtesë, institucioni kishte nevojë urgjente për staf profesional në laboratorin toksikologjik, i cili funksiononte vetëm me një laborant dhe pa biolog. Laboratori është i vetmi në vend që kryen përcaktim semikvantitativ të koncentrimit të substancave psikoaktive dhe, sipas stafit, funksionimi i tij ishte vënë seriozisht në pikëpyetje.

Inspektorati Shtetëror Shëndetësor dhe Sanitar, në prill 2024, kishte konstatuar se 11 punonjës shëndetësorë punonin pa kontrata të vlefshme dhe kishte urdhëruar t’u ndalohej qasja në Klinikë, por vendimi nuk ishte zbatuar.

Iljazi ishte kritikuar edhe nga organizatat e gazetarëve pasi kishte nxjerrë urdhër me të cilin u ndalonte punonjësve komunikimin me media lidhur me problemet në institucion, veprim që ishte vlerësuar si cenim i lirisë së informimit.VOXAL

Tubacioni përmes të cilit transsportohet derivati dizel nga Rafineria në Selanik drejt rafinerisë OKTA në Shkup, pas 13 viteve sërish vihet në përdorim. Ministria e Energjetikës sot kumtoi se janë bërë të gjitha kontrollet e nevojshme për funksionalitetin e sistemit dhe se ky është hap i rëndësishëm për përforcimin e sigurisë në furnizimin me derivate të naftës.

Kontrolli u krye nga ana e Byrosë për metrologji me pjesëmarrje të përfaqësuesve nga Instituti metrologjik çek (CMI) dhe laboratori “Metron” nga Selaniku, në prani të përfaqësuesve nga Shërbimi doganor.

“Sipas ministres së Energjetikës, Sanja Bozhinovska, korrektësia teknike dhe saktësia e matjes janë parakushte kyçe për funksionim të sigurt dhe transparent të infrastrukturës energjetike.

“Ky është hap i rëndësihëm drejt vendosjes së një sistemi të sigurt dhe modern për furnizim me derivate. Matja e saktë, kontrolli dhe verifikimi ndërkombëtar do të thonë besim, stabilitet dhe siguri afatgjate energjetike për shtetin”, theksoi Bozhinovska.

Tubacioni, i lëshuar në funksion në vitin 2022 për bartje të naftës së papërpunuar, pas vitit 2013 ishte lëndë e investimeve për ridedikimin e tij në infrastrukturën për transport të derivateve dizel.

Advertisement

Bëhet fjalë për sistem në gjatësi prej 213,5 kilometrave. Infrastruktura disponon me 15 stacione bllok-ventilimi për menaxhim të përmirësuar dhe nivel të lartë të sigurisë, kapacitete deponuese prej 80.000 m³ në Greqi dhe 30.000 m³ në Maqedoni të Veriut, si dhe sistem bashkëkohor SCADA për ndjekje të presionit, temperaturës dhe qarkullimit në kohë reale, që garanton siguri afatgjate dhe efikasitet.

“Personat që kanë punuar jashtë vendit nuk do të paguajnë taksa nëse vërtetojnë se kompania përmes së cilës janë punësuar ka paguar taksa në vendin ku kanë punuar”, thotë kryeministri Hristijan Mickoski në përgjigje të pyetjes së Televizionit Koha në lidhje me njoftimet e DAP-it për pagesën e taksave për personat që kanë punuar jashtë vendit.
Kryeministri Hristijan Mickoski sqaroi se nuk bëhet fjalë për vendosje të një takse retroaktive. Sipas tij, baza ligjore për këtë detyrim është miratuar nga qeveria e mëparshme e përbërë nga LSDM dhe BDI. Ai theksoi se, për shkak se afatet ligjore kishin përfunduar në fund të vitit të kaluar, Drejtoria e të Ardhurave Publike (DAP) ishte e obliguar t’i njoftonte qytetarët dhe individët për të shlyer detyrimet tatimore ndaj shtetit.

“Dua të sqaroj disa gjëra. Nuk bëhet fjalë për taksë retroaktive. Ky është një ligj që u miratua nga qeveria e mëparshme e LSDM-së dhe BDI-së, ndërsa DAP-i, për shkak se afati ligjor para këtyre vendimeve skadoi në fund të vitit të kaluar, duhej t’u drejtohej individëve, si dhe të gjithë qytetarëve në vend, në mënyrë që ata të paguajnë taksën që duhet të paguajnë në shtet. Nëse DAP-i nuk do ta kishte bërë këtë, atëherë ndonjë qeveri pas nesh ose ndoshta kjo qeveri dhe do të kishte kërkuar përgjegjësi penale për DAP-in, ose më saktë për drejtoreshën, për dëmtimin e Buxhetit. DAP-i vetëm u dorëzoi individëve një njoftim se duhet ta shlyejnë atë detyrim brenda një afati të caktuar”.

Mickoski madje thotë se ka mbajtur takim në lidhje me kërkesat e fundit që u bënë nga qytetarët nëpër protesta, në Tetovë dhe Kumanovë, kryesisht të qytetarëve që kanë punuar në Irak dhe Afganistan.

 “Patëm takim në kabinetin tim, biseduam me njerëz që ishin në pjesë të ndryshme të botës dhe arritëm në përfundimin se ata duhet të vërtetojnë se kompanitë që i punësuan ata paguanin taksë në vendin ose vendet ku ishin punësuar. Dhe në atë mënyrë, DAP-i nuk do ta paguajë atë taksë”.

Përndryshe organizatorët e protestave kanë paralajmëruar se protestat do të vazhdojnë deri sa të merren parasysh kërkesat e tyre.

Advertisement