Nga Ministria e Punëve të Brendshme njoftojnë se gjatë ditës së djeshme, respektivisht brenda 24 orëve të kaluara, janë regjistruar gjithsej 50.652 kundërvajtje nga ana e sistemit “Safe City”, përcjell TV21. Kundërvajtjet janë regjistruar në rajonin e Sektorit të Punëve të Brendshme në Shkup.

Më 02.12.2025 janë regjistruar gjithsej 50.652 shkelje, nga të cilat 48.861 për shpejtësi, 1.366 për kalim në semafor të kuqe dhe 425 për automjete të paregjistruara”, thonë nga MPB.

Sot, në selinë e Partisë Demokratike Shqiptare, Kryetari i PDSH-së, z. Menduh Thaçi, priti në takim Ambasadorin e Republikës Çeke në Shkup, Shkëlqesinë e Tij z. Jaroslav Ludva, i shoqëruar nga bashkëpunëtori i tij, z. Veton Kodra.

Gjatë takimit u zhvillua një diskutim i hapur dhe konstruktiv mbi situatën aktuale politike në vend, me theks të veçantë në proceset integruese drejt Bashkimit Evropian. Kryetari Thaçi vlerësoi lart rolin dhe kontributin e Republikës Çeke, si dhe të partnerëve të tjerë evropianë, për mbështetjen e vazhdueshme që i ofrojnë këtyre proceseve.

Ai shprehu shqetësimin e tij për ngecjet në rrugën e Maqedonisë së Veriut drejt hapjes së negociatave me BE-në, duke theksuar nevojën e domosdoshme për ndërmarrjen e hapave urgjentë që do të mundësonin zhbllokimin e këtij procesi. Kryetari Thaçi ritheksoi se PDSH-ja do të vazhdojë të jetë një zë i qartë dhe kritik ndaj çdo pengese që ndikon negativisht në perspektivën evropiane të vendit.

Komisioni për Mbrojtjen e Konkurrencës ka gjobitur dhjetë kompani sigurimesh me një gjobë totale prej 276.000 eurosh. Ata kanë bashkëpunuar mes vete dhe vitin e kaluar kanë rritur çmimin e regjistrimit të automjeteve, përmes rritjes së çmimit të polisës së sigurimit të detyrueshëm për automjetet. Kjo është polisa e detyrueshme që çdo pronar automjeti duhet ta paguajë gjatë regjistrimit.

“Në procedurë është konstatuar se kompanitë e sigurimeve gjatë periudhës 01.03.2024 – 07.05.2024, kanë shkëmbyer informacione të ndjeshme, kanë koordinuar aktivitetet dhe në një kohë jashtëzakonisht të shkurtër kanë marrë vendime identike ose të harmonizuara për rritjen e pjesës së premiumit për kryerjen e aktivitetit – e ashtuquajtura shtesë administrative”, thonë nga Komisioni.

Sipas Komisionit, dhjetë kompanitë e sigurimeve kanë kryer formën më të rëndë të shkeljes së Ligjit për Mbrojtjen e Konkurrencës.
“Kjo lloj sjellje përbën kufizim të konkurrencës “qëllimisht”, pra formën më të rëndë të shkeljes sipas nenit 7 të Ligjit për Mbrojtjen e Konkurrencës. Shkëmbimi i informacioneve dhe marrja e vendimeve të përbashkëta për çmimet zëvendëson politikën e pavarur të biznesit me veprim të koordinuar kolektiv në treg, gjë që është rreptësisht e ndaluar”, thonë nga Komisioni.

Më parë, Komisioni ka konstatuar kartel edhe tek marketet. Për bashkim kartelist dhe marrëveshje çmimesh, katër zinxhirë të mëdhenj marketesh janë gjobitur me nga 50.000 euro secili, si dhe Lidhja e Odave Ekonomike me 18.000 euro. Të dy procedurat, si për marketet ashtu edhe për kompanitë e sigurimeve, Komisioni i ka nisur këtë pranverë.