Grupi parlamentar i LSDM-së dhe koalicionit sot në Kuvend ka dorëzuar Propozim-ligjin për rritjen e pagës minimale në 600 euro, përkatësisht 36.960 denarë.

Kryetari i LSDM-së, Venko Filipçe, tha se në këtë mënyrë do t’u mundësohet punëtorëve të kenë një jetë dinjitoze dhe të mbulojnë shpenzimet bazë.

 “Paga minimale aktualisht është 26.000 denarë. Në këtë situatë krize, me çmimet e larta të karburanteve, që tashmë kalojnë 100 denarë për litër, dhe me rritjen e çmimeve të karburanteve për 50 për qind që nga fillimi i këtij viti, është krijuar një spirale e rritjes së çmimeve të të gjitha produkteve, veçanërisht të produkteve ushqimore. Kjo ka rritur edhe vlerën e shportës së konsumit”

Ai shtoi se paga minimale është absolutisht e pamjaftueshme për një jetë të mirë dhe dinjitoze, veçanërisht për punëtorët, duke theksuar se mbi 70 për qind e tyre jetojnë me të ardhura mes pagës minimale dhe pagës mesatare në vend.

“Në kushtet kur shporta minimale sindikale është afër 70.000 denarëve, nëse kësaj i shtohen shpenzimet për qira ose kësti i kredisë për banesë, shuma arrin në 90.000 e madje edhe mbi 90.000 denarë. Paga minimale aktuale mbulon vetëm 37 për qind të shpenzimeve totale, nëse përjashtohen qiraja ose kredia për banesë, ndërsa vetëm 31 për qind nëse familja paguan qira ose ka kredi për banesë”

Advertisement

Filipçe shtoi se LSDM-ja për herë të tretë propozon që paga minimale të jetë 600 euro, pasi pushteti e ka refuzuar këtë propozim dy herë.

Zbrazja e fshatrave malore dhe rënia e lindshmërisë po çojnë drejt mbylljes së shkollave në rajonin e Pollogut. Për të përballuar këtë krizë, kryetarët e komunave janë mbledhur sot ku kanë propozuar uljen e fondit të orëve për arsimtarët dhe zvogëlimin e numrit të nxënësve për klasë, si mënyrë për të parandaluar mbylljen e mëtejshme të paraleleve.

OPTIMIZIMI NË ARSIM: SHKOLLAT PERIFERIKE NË POLLOG DREJT MBYLLJES

KRYETARËT E POLLOGUT KËRKOJNË ULJEN E ORËVE PËR ARSIMTARËT

Rënia e vazhdueshme e numrit të nxënësve dhe zbrazja e fshatrave malore të Tetovës ka bërë që kryetarët e komunave të Rajonit Planor të Pollogut të mblidhen sot për të diskutuar procesin e optimizimit të shkollave. Sipas kryetarit të këtij rajoni, Blerim Sejdiu, shumë shkolla periferike së shpejti pritet të mbyllen për shkak të mungesës së nxënësve, ndërsa arsimtarët do të duhet të transferohen në vatrat qendrore arsimore.

“Tani si sfidë më kryesore janë shkollat periferike apo të malësisë ku nuk ka asnjë nxënës. Tek ne konkretisht nuk ka asnjë shkollë, po do paraqiten ku nuk do të ketë asnjë nxënës dhe ajo shkollë fatkeqësisht dhe detyrimisht do duhet të mbyllë. Ka nisur optimizimi në të gjithë Maqedoninë dhe do të vazhdojë edhe në shkollat e tjera. Këtu nuk ka faj askush se një shkollë e caktuar nuk ka nxënës fare. Flasim, nëse ka një nxënës, shkolla do vazhdojë me procesin mësimor, por nëse s’ka asnjë nxënës do detyrohemi që të mbyllim atë shkollë dhe ai arsimtar apo ata arsimtarë do të duhet të transferohen në shkollat qendrore.”

Advertisement

Sejdiu theksoi se kryetarët e komunave kanë rënë dakord t’i drejtojnë një kërkesë zyrtare Ministrisë së Arsimit. Ata kërkojnë që fondi javor i orëve të arsimtarëve të uljet nga 20 në 15 orë, si dhe numri minimal i nxënësve për paralellë të jetë 15 dhe jo mbi 20 siç është aktualisht. Sipas tyre, ky hap do të ndihmonte në ruajtjen e cilësisë së arsimit dhe do të parandalonte mbylljen e mjaft klasave në zonat malore.

“Në lidhje me numrin e nxënësve që paraqesin me paralelet, duhet që fondi i orëve që sot është me 20 orë, ne do të kërkojmë që fondi i orëve i plotë të jetë me 15 orë, jo me 20 siç është tani. Me këtë konsiderohet fondi i plotë i orëve, pra duke pasur parasysh se bie numri i nxënësve. Normalisht paralelet të jenë me numër prej 15 nxënës e më lartë, dhe jo siç është tani pra mbi 20 nxënës. Kështu që duke pasur parasysh performancën dhe numrin e nxënësve, ashtu edhe kërkesat tona do t’i bëjmë. Kemi pika taksative se çfarë do t’i drejtojmë ministrisë dhe për këtë e theksojmë përsëri që të ruajmë vetëm e vetëm kualitetin arsimor tek shkollat tona.”

Këtë vit në rajonin e Pollogut u mbyll shkolla periferike në fshatin Sellcë të Keqe, ndërsa vitin e kaluar dyer t e saj i mbylli edhe shkolla në fshatin Veshallë. Përderisa vatrat arsimore në fshatrat malore po shuhen dita-ditës, në shkollat e qytetit vërehet një rritje e numrit të nxënësve.

Një zjarr i madh ka shpërthyer gjatë natës në një objekt afarist në Komunën e Shuto Orizares në Shkup. Sipas Ministrisë së Punëve të Brendshme, nga zjarri nuk ka persona të lënduar, por është shkaktuar dëm i madh material.

Zjarri ka shpërthyer pak pas orës 03.00 të mëngjesit, ndërsa janë përfshirë nga flakët mbi 20 dyqane me tekstil dhe mallra të tjera, të gjitha në pronësi të një personi.

Nga MPB-ja bëjnë të ditur se sot, rreth orës 03:20, në SPB Shkup është raportuar se në një qendër tregtare në territorin e Shuto Orizares janë përfshirë nga zjarri mbi 20 dyqane, në pronësi të S.S., të cilat ishin dhënë me qira.

Zjarri është shuar nga Brigada e Zjarrfikësve e Shkupit. Nuk raportohet për persona të lënduar.

Deri tani nuk dihen shkaqet e zjarrit, përkatësisht se çfarë e ka shkaktuar atë.

Advertisement

Nga MPB-ja njoftojnë se në vendngjarje do të kryhet ekspertizë dhe se po ndërmerren masa për zbardhjen e plotë të rastit.

Përmasat e zjarrit dëshmohen edhe nga angazhimi i Brigadës së Zjarrfikësve të Shkupit. Sipas Qendrës për Menaxhim me Kriza, në shuarjen e zjarrit kanë marrë pjesë 15 zjarrfikës me gjashtë automjete zjarrfikëse.

Intervenimi ka zgjatur nga ora 03:31 deri në 06:45 të mëngjesit.

Sipas informacioneve të QMK-së, zjarri ka përfshirë një objekt afarist në rrugën “Indira Gandi”, në Komunën e Shuto Orizares.

Advertisement