Kryeministri Hristijan Mickoski veçmë ka nisur analizat dhe shqyrtimin për rikonstruimin e Qeverisë, pas zgjedhjes së Izet Mexhitit në krye të komunës së Çairit, por edhe për rifreskime të reja të kabinetit qeveritar.

Siç bëhet e ditur nga portali SDK, Bekim Sali do ta zëvendësojë Mexhitin në detyrën e zv/kryeministrit, ndërsa për postin e ministrit të Mjedisit do të emërohet një kuadër tjetër nga VLEN, gjegjësisht nga radhët e Lëvizjes Demokratike (LD). Në kombinim janë shumë emra, por deri tani asgjë nuk është konkretizuar, përcjell INA.

Me ndryshimet e reja në Qeveri, VLEN nga 6 do të ketë 7 resore ministrore, pasi që zëvendëskryeministri i parë do të mbajë edhe postin e një ministri pa resor, që do të shtohet në kuadër të Qeverisë.

VMRO-DPMNE siç thuhet tanimë ka shfaqur pakënaqësi ndaj dy ministrave nga radhët e ZNAM-it, Igor Filkov dhe Goran Minçev, veçanërisht ndaj Filkovit, ministër i Drejtësisë. Sipas portalit Sdk.mk, Mickoski nuk ka shprehur pakënaqësi për resorët e Ekonomisë dhe Financave, që sipas raportit të fundit të Komisionit Evropian kanë përparuar reformën dhe disiplinën financiare, por problem mbetet ministrja e Arsimit, Vesna Janevska.

Sipas këtij portali, nga VMRO-DPMNE ende nuk ka deklarata se nga cilët ministra të “VLEN” është i pakënaqur kryeministri, duke lënë të hapur mundësinë që vetë koalicioni të propozojë ndryshime në radhët e tij. “Menjëherë pas zgjedhjeve do të hapim dyert e partisë për ndryshime të reja dhe njerëz të rinj, dhe në Qeveri do të ketë rikonstruksion dhe përmirësim të kapaciteteve,” kishte theksuar Mickoski më 23 gusht, menjëherë pas shpalljes së zgjedhjeve lokale që tashmë kanë përfunduar. (INA)

Advertisement

Në Ministrinë për Arsim dhe Shkencë në Maqedoninë e Veriut do të mund të aplikojnë shkollat fillore dhe të mesme për të përfituar grant në vlerë prej 60 mijë denarë për financimin e projekteve kundër fenomeneve negative që po ndodhin te të rinjtë, transmeton Portalb.mk.

“Mjete financiare për 30 shkolla fillore për realizimin e aktiviteteve nga programet për mbrojtje nga dhuna, keqpërdorimi dhe neglizhenca e nxënësve me aftësi dhe pa aftësi të kufizuara, programet për parandalimin e diskriminimit dhe programet për parandalimin e keqpërdorimit të alkoolit dhe duhanit, drogave dhe substancave të tjera psikotrope, si dhe programet për parandalimin e pjesëmarrjes në lojëra fati dhe të delikuencës së miturve,në shumë deri në 60.000 denarë, ndërsa selektimi me rangim do të bëhet nga Komisioni për vlerësimin e aplikacioneve të pranuara, në përputhje me kriteret e përcaktuara”, njoftoi Ministria.

Shkollat fillore deri më 19 dhjetor do të mund të paraqesin projektin në adresën elektronike http://e-uslugi.mon.gov.mk, ndërsa në afat prej 30 ditëve do të publikohen rezultatet.

Pas rezultateve të dobëta në zgjedhjet lokale në komunën e Sarajit, ku koalicioni Aleanca për Integrim Kombëtar (AKI) nuk arriti të sigurojë fitore, partia ka ndërmarrë lëvizje të rëndësishme brenda strukturave të saj.

Burime brenda BDI-së bëjnë të ditur se Blerim Bexheti është shkarkuar nga detyra e koordinatorit të grupit parlamentar, një vendim që vjen pas analizës së performancës së partisë në zgjedhjet e fundit.

Në vend të tij është emëruar Rina Ajdari, e cila tashmë do të udhëheqë grupin parlamentar të BDI-së. Emërimi i saj shihet si një përpjekje për të sjellë frymë të re dhe qasje më dinamike në drejtimin e grupit, në përputhje me nevojat për rigjallërim politik pas humbjeve të fundit.

Ky ndryshim vlerësohet si një “sinjal politik” i qartë nga udhëheqja e BDI-së për përgjegjësi dhe reformim të brendshëm, ndërsa partia përgatitet për sfidat e ardhshme në skenën politike.(INA)