Lajme nga vendi
Kronika e zezë – Tetovë dhe Gostivar, 07 Korrik
Dje në ora 09:00 në fshatin Siriçinë të Tetovës, zyrtarë policorë nga Stacioni Policor i Jegunocit kanë ndaluar automjetin e udhëtarëve „Ford“ me targa të Shkupit, i drejtuar nga një 46-vjeçar nga Shkupi. Gjatë kontrollit është konstatuar se personi po drejtonte automjetin edhe pse kishte ndalesë aktive për drejtim mjeti, pas së cilës është privuar nga liria sipas nenit 297-a të Kodit Penal, ndërsa automjeti është ndaluar për procedurë të mëtejshme dhe pas dokumentimit të rastit do të vijojë parashtresa përkatëse.
……Dje në ora 16:40 në rrugën „121“ në Tetovë, zyrtarë policorë kanë ndaluar një moped „Aprilia“ me targa të Tetovës, i drejtuar nga një 18-vjeçar nga Tetova, me çka është konstatuar se nuk posedonte patentë shoferi. Në konsultim me prokurorin kujdestar publik, i njëjti është privuar nga liria sipas nenit 297-a të KP, ndërsa mopedi është konfiskuar. Pas dokumentimit të rastit do të dorëzohet parashtresë përkatëse.
……Dje në ora 09:30 në SPB Tetovë, një burrë 63-vjeçar nga Tetova, si autorizues i nënës së tij, ka denoncuar veprën penale „lëshim i çekut pa mbulim dhe keqpërdorim i kartelës pagesore“. Sipas denoncimit, më 03.07.2026 denoncuesi ka vërejtur mungesë të mjeteve financiare në vlerë prej 8.148 denarë në llogarinë transaksionale të nënës së tij, përkatësisht shtatë pagesa të paautorizuara online. Po merren masa për zbardhjen e rastit.
…… Dje në ora 12:00 në SPB Tetovë, një 46-vjeçare nga Tetova ka denoncuar se një ditë më parë rreth orës 23:30 para objektit të banimit, fqinji e ka sulmuar fizikisht djalin e saj 16-vjeçar. Po merren masa për zbardhjen e ngjarjes.
……Dje në ora 12:45 në SP Gallatë, një 29-vjeçar nga fshati Gradec ka denoncuar se rreth orës 10:00 në punëtorinë e tij në fshatin Gradec është sulmuar fizikisht nga një qytetar nga po i njëjti fshat. Po punohet për zbardhjen e rastit.
……Dje në ora 12:25 në DPB Gostivar është denoncuar se në rrugën „Sedek Kostoski“ në Gostivar ka ndodhur një aksident komunikacioni mes një mopedi me targa të Gostivarit, i drejtuar nga një 19-vjeçar nga Gostivari dhe një biçiklete të drejtuar nga një 68-vjeçar nga Gostivari. Në aksident lëndime të rënda trupore ka pësuar 68-vjeçari, të konstatuara në Qendrën Urgjente në Gostivar. Këqyrja e vendit të ngjarjes është kryer nga ekipi i SPB Tetovë.
……Dje në ora 12:10 nga Qendra Urgjente Gostivar është denoncuar se tek ata është sjellë një person i lënduar. Zyrtarët policorë nga SP Gostivar kanë kryer verifikime, me çka është konstatuar se bëhet fjalë për një 33-vjeçar nga Gostivari, i cili ishte gjetur i rrëzuar në korsinë e rrugës „Nikolla Parapunov“ në afërsi të Sahat Kullës. Po merren masa për zbardhjen e rastit.
……Dje në SP Gostivar, një grua 41-vjeçare nga rrethina e Gostivarit ka denoncuar se rreth orës 18:00 në shtëpinë familjare është sulmuar fizikisht nga bashkëshorti i saj. Po merren masa për zbardhjen e rastit.
…..Dje në SPB Tetovë, një 19-vjeçar nga fshati Pallçisht i Poshtëm ka denoncuar se rreth orës 18:15 në rrugën „Ilinden“ në Tetovë, derisa po lëvizte me shokët e tij, është sulmuar fizikisht dhe me një send të fortë nga disa persona. Menjëherë janë ndërmarrë masat dhe aktivitetet përkatëse dhe janë privuar nga liria një 18-vjeçar dhe dy 16-vjeçarë, të gjithë nga Tetova, ndërsa tek ata janë gjetur dhe konfiskuar sende të forta dhe një send i mprehtë. Pas dokumentimit të rastit do të dorëzohet parashtresë përkatëse.
……Dje nga ana e zyrtarëve policorë të SP Tetovë, për shkak të qëndrimit të padeklaruar në vend, është arrestuar shtetasi i huaj një 26-vjeçar nga Peja, Republika e Kosovës. Ai është ndaluar në stacionin policor për procedurë të mëtejshme.
……Pas mesnate në ora 01:41 në SPB Tetovë, një qytetar nga Tetova, punonjës në NPK Tetova, ka denoncuar se derisa po kryente detyrat e punës në rrugën „Bllagoja Toska“ në afërsi të një objekti hotelier, është sulmuar fizikisht nga një person i panjohur. Po merren masa për identifikimin e autorit dhe zbardhjen e rastit.
Në mbrëmjen e së mërkurës të gjitha rrugët çonin në fshatin Neproshten të Komunës së Tearcës.
Qytetarët e këtij vendbanimi nën drejtimin e Forumit Rinor organizuan Manifestimin Përkujtimor Jubilar me rastin e 25-vjetorit të rënies heroike të dëshmorëve Bedri Alimi dhe Rametulla Ameti.
Homazhe dhe Ekspozita në Parkun e Dëshmorëve në Neproshten shënuan pasditen e së mërkurës, ku qytetarë të shumtë edhe një herë rikujtuan ditët e lavdisë së këtij fshati por edhe dëmet që pësoi gjatë luftës së vitit 2001 nga granatimet e ushtrisë e policisë maqedonase.
KUSHTRIM ZENDELI – Neproshteni kishte festë krenarie e atdhedashurie. Qëllimi sipas organizatorëve është që të mos harrohen dëshmorët e kombit.
Me intonimi i himnit Kombëtar dhe një minutë heshtje për të nderuar Dëshmorët e Kombit, nisi Manifestimin Përkujtimor Jubilar me rastin e 25-vjetorit të rënies heroike të dëshmorëve Bedri Alimi dhe Rametulla Ameti.
Neproshteni mblodhi shumë ish-luftëtarë të UÇK-së, ish-Komandantë, familje të dëshmorëve, veteranë e invalid të luftës, të cilët përkujtuan ditët e lavdishme të Korrikut 2001 dhe sakrificën e rezistencën e popullatës shqiptare dhe ushtarëve të lirisë duke dhënë betimin se veprat e tyre do të kujtohen përjetësisht.
Për të madhështuar këtë mbrëmje përkujtimore organizatori kishte përgatitur një program dokumentar kurse ishin të ftuar edhe artistët Arian Agushi apo GOLD AG dhe Basri Lushtaku.
/Tv Koha/
Lajme nga vendi
U vjen fundi giveaway-ve pa rregulla në Maqedoni, nga 14 korriku hyn në fuqi ligji për lojërat shpërblyese online Leje e detyrueshme dhe tarifë 18%
Ministria e Financave njofton se me ndryshimet ligjore synohet rritja e transparencës, garantimi i sigurisë juridike dhe mbrojtja më e madhe e pjesëmarrësve në giveaway.
Sipas ligjit të ri, çdo organizator do të duhet të sigurojë leje nga Ministria e Financave, ndërsa kërkesa duhet të dorëzohet të paktën 30 ditë para fillimit të giveaway-t. Bashkë me kërkesën duhet të dorëzohet dokumentacioni i nevojshëm, i cili ndryshon varësisht nëse organizatori është tregtar individual apo shoqëri tregtare.
Një nga risitë kryesore është edhe detyrimi për pagesën e një tarife prej 18 për qind të vlerës së përgjithshme të fondit të shpërblimeve, e cila duhet të paguhet brenda tre ditëve nga marrja e lejes. Në të kundërtën, leja do të revokohet.
Ligji parashikon gjithashtu publikimin e detyrueshëm të rregullave të giveaway-t para nisjes së tij, ndërsa emrat e fituesve duhet të publikohen jo më vonë se tre ditë pas përzgjedhjes. Shpërblimet duhet t’u dorëzohen fituesve brenda afatit të përcaktuar në rregullat e lojës, i cili nuk mund të jetë më i gjatë se 60 ditë nga publikimi i rezultateve.
Rregullat e giveaway-t do të duhet të përmbajnë të gjitha informacionet kryesore, përfshirë organizatorin, produktet ose shërbimet që promovohen, kushtet e pjesëmarrjes, kohëzgjatjen e lojës, mënyrën e përzgjedhjes së fituesve, vlerën e shpërblimeve dhe procedurën për paraqitjen e ankesave. Ligji ndalon pjesëmarrjen e të punësuarve te organizatori dhe të anëtarëve të familjeve të tyre të ngushta, ndërsa një giveaway nuk mund të zgjasë më shumë se një vit.
Për herë të parë, ligji jep edhe një përkufizim zyrtar të giveaway-t, duke e cilësuar si një lojë fati ku pjesëmarrja realizohet përmes aktiviteteve si like, tag, share ose publikimi i përmbajtjeve me qëllim promovimin e produkteve apo shërbimeve.
Me këto ndryshime rregullohen për herë të parë edhe aktivitetet promovuese në internet dhe rrjetet sociale, ndërsa Ministria e Financave vlerëson se korniza e re ligjore do të sjellë rregulla më të qarta për organizatorët, transparencë më të madhe dhe mbrojtje më të mirë për qytetarët që marrin pjesë në giveaway./INA/
Lajme nga vendi
Mjeku Visar Xhaferi ngre alarmin: Kërkon nisjen urgjente të screeningut për kancerin e mushkërive
Mjeku torakal nga Tetova, Visar Xhaferi, ka bërë thirrje publike për nisjen urgjente të programit të screeningut për kancerin e mushkërive në Maqedoninë e Veriut, duke kritikuar institucionet për mosrealizimin e këtij detyrimi, transmeton Zyrtare.
Në një postim në rrjetet sociale, Xhaferi thekson se nga e hëna e kaluar deri të martën, brenda vetëm tetë ditëve, në ambulancën e Kirurgjisë Torakale në Tetovë janë paraqitur katër pacientë me kancer të mushkërive në fazë shumë të avancuar dhe të paoperueshme. Sipas tij, njëri prej tyre është edhe prindi i një miku të tij të ngushtë, i diagnostikuar me metastaza të largëta.
“Edhe sa pacientë duhet të vdesin nga kanceri i mushkërive që Ministria e Shëndetësisë ta nisë screeningun dhe Qeveria të sigurojë fondet për realizimin e tij?”, pyet ai.
Xhaferi thekson se kanceri i mushkërive është sëmundja malinje me shkallën më të lartë të vdekshmërisë në vend, duke shtuar se askush, pavarësisht pozitës apo pasurisë, nuk është i paprekshëm nga pasojat e diagnostikimit të vonshëm.
Sipas tij, gjatë vitit të kaluar në Klinikën e Onkologjisë në Shkup janë regjistruar rreth 1.200 raste me kancer të mushkërive, ndërsa në të gjithë Maqedoninë e Veriut janë operuar vetëm 80 deri në 90 pacientë, gjë që, sipas mjekut, tregon se shumica e rasteve zbulohen në faza të avancuara, kur ndërhyrja kirurgjikale nuk është më e mundur.
NEPROSHTENI PËRKUJTOI DËSHMORËT BEDRI ALIMI DHE RAMETULLA AMETI
U vjen fundi giveaway-ve pa rregulla në Maqedoni, nga 14 korriku hyn në fuqi ligji për lojërat shpërblyese online Leje e detyrueshme dhe tarifë 18%
Mjeku Visar Xhaferi ngre alarmin: Kërkon nisjen urgjente të screeningut për kancerin e mushkërive
Zyra e Avokatit të Popullit në Tetovë sot do të jetë e hapur
Nesër në Maqedoni do të shpallet gjendje krize në energjetikë, nga 1 shtatori hyjnë në fuqi masat për kursim
Kovaçevski paralajmëroi drejtor të ri të Drejtorisë për Zbatimin e Sanksioneve
Azizi zbulon dyfytyrësinë e Ali Ahmetit: Ja vazali që e mbronte Gruevskin
Visar Ganiu ua uron Kurban Bajramin: Ju uroj që kjo festë e shenjtë t’ju sjellë paqe në zemër | VIDEO
