Lajme nga vendi
DW: “Qëndrimi i ashpër ndaj Grubit – çmim i rëndë për BDI-në?”
Më herët për këtë vetëm pëshpëritej, ndërsa tani po shfaqen edhe kritikat e para publike se zyrtarët e BDI-së nuk i kanë dhënë mbështetje Artan Grubit dhe familjes së tij, mbi të gjitha në aspektin njerëzor. A mund të rezultojë aktakuza ndaj Artan Grubit edhe me një tronditje brenda BDI-së? Edhe pse formalisht njëra nuk lidhet me tjetrën, kjo çështje prek selinë e BDI-së në Reçicë të Vogël për shkak të reagimeve për një qëndrim të pretenduar si të papërshtatshëm të kreut të partisë ndaj ish-funksionarit të lartë shumëvjeçar.
Burime brenda partisë thonë se kjo është një temë për të cilën prej kohësh dëgjohen spekulime të ndryshme. Jo vetëm për shkak të vlerësimit të VLEN-it se Artan Grubi është “kutia e zezë e BDI-së”, që nënkupton mundësinë që ai të zbulojë të dhëna sensitive nga dy dekada të BDI-së në pushtet, por edhe për shkak të shqetësimit se po zien pakënaqësia për mënyrën se si kreu i BDI-së është sjellë ndaj Grubit dhe familjes së tij.
Çështja u aktualizua pas kthimit të Grubit nga arratia dhe u rikthye në vëmendje pasi, katër ditë më parë, ndaj tij dhe shtatë personave të tjerë u ngrit aktakuzë për keqpërdorime prej rreth 8.2 milionë eurosh në “Lotarinë Shtetërore”.
Burime nga nivelet më të ulëta të BDI-së thonë se nuk e dinë nëse dhe çfarë mbështetjeje kanë treguar ndaj familjes së Grubit funksionarët e partisë që deri dje ishin “krah për krah me të”, por se disa deklarata publike lënë të kuptohet se një mbështetje e tillë ka munguar.
“Ajo që i hidhet si gur BDI-së është se çfarë qëndrimi ka treguar partia ndaj Grubit, nga aspekti njerëzor. Dëgjohet se gjatë kohës që ai nuk ishte këtu, askush ose pjesa më e madhe e udhëheqjes nuk është interesuar se si është familja e tij, si janë fëmijët… Nuk e di nëse është e vërtetë. Do të doja të mos ishte. Por flitet edhe se, për shkak se ishte vendosur në listën e zezë, është kalkuluar se sa distancimi apo mosdistancimi prej tij do t’u sillte përfitim ose dëm”, thotë një anëtar i partisë.
“Nuk u treguan siç duhej”
Një kritikë publike për mungesën e mbështetjes erdhi përmes një postimi në Facebook nga aktivisti i BDI-së, Artin Spahiu, i cili shkruan:
“Artani dhe familja e tij po përballen të vetëm në këtë betejë, pa zërin dhe aktivitetin e organizatës sonë.”
Ai thotë se këtu nuk bëhet fjalë vetëm për parti, struktura apo interesa politike.
“Para se të jemi anëtarë të partisë, funksionarë apo pjesë e cilësdo strukturë, ne jemi njerëz. Dhe mbi të gjitha, duhet të kemi ndjeshmëri njerëzore dhe empati. Për fat të keq, për më shumë se 21 muaj, asnjëri prej atyre që sot quhen ‘politbyro’ nuk u tregua në mënyrën që duhej.”
Spahiu kujton se shumë prej atyre që sot përbëjnë “politbyronë” e BDI-së, sipas tij, janë vendosur në pozitat e tyre falë Grubit pas Kongresit të partisë në dhjetor 2019 dhe zgjedhjeve të brendshme që pasuan, ndërsa atëherë e quanin “shef”, “vëlla” dhe “mbret”.
“Nuk është Artani ai që ka nevojë për ta. Përkundrazi, pikërisht ata duhet të qëndrojnë pranë Artanit, për hir të vetvetes. Artani është si ujku që vetë i ka udhëhequr betejat. Por kjo nuk e arsyeton heshtjen e atyre që dikur kanë përfituar nga forca, ndikimi dhe mbështetja e tij”, vlerëson Spahiu.
Nga se kanë frikë?
Grubi konsiderohet si një njeri që “di shumë”, duke pasur parasysh se që nga viti 2011 është aktiv në BDI dhe ka mbajtur disa poste të larta, ndërsa për një periudhë ka qenë edhe shef i kabinetit të kryetarit të partisë, Ali Ahmeti.
Nga 30 gushti 2020 deri më 23 qershor 2024, ai ishte zëvendëskryeministër i parë dhe ministër për Sistem Politik dhe Marrëdhënie Ndërmjet Bashkësive. Gjatë kësaj periudhe, qeveria pranoi “propozimin francez”, u miratuan ndryshimet kontroverse të Kodit Penal dhe, sipas pretendimeve të ndryshme, u zhvilluan edhe negociata prapa skenës për kthimin e Gruevskit në vend.
Rami Mislimi, gazetar i portalit “Tetova Sot”, shkruan se nuk dëshiron të flasë për fuqinë politike që kishte Grubi, as për të ardhmen e tij politike apo vendimin e Prokurorisë, por për heshtjen e funksionarëve të BDI-së ndaj Artan Grubit.
“Ata (BDI-ja – v.j.) nuk thanë se rasti me të cilin përballet në Prokurori lidhet me një vendim kolektiv të Qeverisë, të votuar nga 20 ministra. Asnjëherë një status në rrjetet sociale, asnjë fotografi në mbështetje, asnjë deklaratë, asnjë fjalë, madje as një letër. Pse? Askush nuk i ka kërkuar BDI-së dhe funksionarëve të saj të ndikojnë te Prokuroria. Askush nuk u ka kërkuar funksionarëve të saj të ndikojnë te Gjykata. Askush nuk kërkon që një parti politike të vendosë në vend të drejtësisë. Drejtësia është çështje e institucioneve, por më pas shtrohet pyetja: Ku është dinjiteti njerëzor? Ku është njerëzillëku? Ku është solidariteti me një njeri me të cilin për vite kanë ndarë pushtetin, vendimmarrjen dhe përgjegjësinë politike? Pse shumica e funksionarëve të BDI-së nuk thanë asnjë fjalë publike? Nga kush kanë frikë?”, pyet Mislimi.
A mund të shkaktojë aktakuza ndaj Artan Grubit tronditje në Reçicë të Vogël?
BDI-ja, për të qenë korrektë, para tri ditësh reagoi me një komunikatë të titulluar “Dy vite hetim pa asnjë provë, aktakuzë absurde politike për një vendim kolektiv”, por pa përmendur se për cilin rast bëhet fjalë dhe emrin e kujt po e mbron nga “aktakuza absurde politike”.
“Pas dy vitesh hetim, publiku meriton të dijë mbi cilat prova dhe argumente konkrete bazohet një aktakuzë e tillë. Ne respektojmë pavarësinë e institucioneve të drejtësisë, por në të njëjtën kohë kërkojmë drejtësi të barabartë dhe selektive. Vendimet kolektive nuk mund të shndërrohen në instrument për përgjegjësi selektive dhe përndjekje individuale politike…”
BDI-ja kërkoi gjithashtu transparencë të plotë të procesit dhe mbikëqyrje ndërkombëtare të hapur e transparente të rastit, duke theksuar se nuk kërkon privilegje për askënd, por “zbatim të barabartë të ligjit, proces të drejtë dhe drejtësi pa ndikim politik”.
VLEN: Kohë të vështira për Ali Ahmetin
“Për cilën aktakuzë? Kundër kujt është? Rastësisht apo jo, nuk përmenden emrat? Çfarë shqetësimi pa emër është ky?”, ishin disa nga komentet në rrjetet sociale pas reagimit të BDI-së.
Nga koalicioni qeverisës VLEN në disa raste kanë përsëritur se e kanë përgjigjen se pse dhe nga kush ka frikë BDI-ja.
“Prej kohësh themi se Artan Grubi është ‘kutia e zezë’ e BDI-së dhe se shumë përllogaritje dhe zhvillime në këtë parti varen nga prania ose mungesa e tij (…) Për Ali Ahmetin, kohët e vështira sapo kanë filluar. Nuk mund të vazhdojë përpara, por as nuk ka ku të kthehet!”
Nga VLEN vlerësojnë se “frika nga kujtesa e Grubit tashmë po merr tatim”./DW
Lajme nga vendi
Vandalizohen pajisjet e shënjimit dimëror në Kodrën e Diellit, reagon Ambasada e Austrisë
Vandalizohen pajisjet e shënjimit dimëror në Kodrën e Diellit, reagon Ambasada e Austrisë
Ambasada e Austrisë ka reaguar pas dëmtimit dhe largimit të një pjese të konsiderueshme të pajisjeve të reja për shënjimin dimëror të shtegut të Majës së Titos në Kodrën e Diellit, në gjatësi prej rreth 11 kilometrash.
Sipas njoftimit, më shumë se 45 nga gjithsej 112 shtylla janë shkatërruar, dëmtuar ose larguar, ndërsa dëmi financiar vlerësohet në të paktën 8 mijë euro, apo rreth 500 mijë denarë
Shënjimi dimëror është realizuar në kuadër të projektit “Slavkov – Shënjimi i shtigjeve malore në Maqedoninë e Veriut”, i mbështetur financiarisht nga Ambasadat e Austrisë, Republikës Çeke dhe Sllovakisë, si dhe nga Birraria e Shkupit. Në realizimin e projektit kanë marrë pjesë më shumë se 25 vullnetarë lokalë dhe biznese të vogla nga Tetova dhe Bogovina.
Nga Ambasada theksojnë se dëmi nuk është vetëm financiar, pasi shkatërrimi i shënjimeve mund të rrezikojë drejtpërdrejt sigurinë e alpinistëve, veçanërisht gjatë kushteve të vështira dimërore me borë, mjegull, erëra të forta dhe dukshmëri të reduktuar.
Rasti është raportuar në Stacionin Policor. Më 19 gusht 2026, një ekip profesional i policisë, në prani të përfaqësuesve të Parkut Kombëtar Mali Sharr, ka kryer inspektim në terren dhe ka dokumentuar lokacionet ku është konstatuar dëmtimi dhe largimi i pajisjeve.
Ambasada pret që institucionet kompetente të zbardhin të gjitha rrethanat dhe të ndërmarrin masat e nevojshme ligjore ndaj personave përgjegjës.
“Shënjimi i shtigjeve malore nuk është vetëm një shtyllë apo një shenjë. Në kushte me borë, mjegull dhe stuhi, ai mund të bëjë dallimin ndërmjet kthimit të sigurt dhe humbjes në mal”, thuhet në reagim.
Mashtruesit e BDI-së, përpara se ta hapin gojën për zgjedhje, duhet të shpjegojnë pse askush në partinë e tyre nuk mori përgjegjësi politike pas humbjes në zgjedhjet lokale. Ali Ahmeti vazhdoi të shiste mjegull me trukun e vjetër të tërheqjes, Bujar Osmani humbi Çairin dhe mbeti nënkryetar dhe lojtar kryesor për fronin e BDI-së, Bajram Rexhepi humbi Tetovën dhe mbeti në kryesinë e partisë, ndërsa Faton Ahmeti u shpërblye për humbjen e tij në zgjedhje me dy poste të reja në parti, nënkryetar dhe shef i kabinetit të Ali Ahmetit.
Në BDI, me sa duket nuk ka përgjegjësi për humbjen, por humbësit shpërblehen.
E njëjta histori përsëritet në Haraçinë, Bogovinë, Tearcë, Strugë, Zhelinë, Saraj dhe Dollnen. Humbën zgjedhjet, por askush nuk lëvizi, askush nuk dha llogari dhe askush nuk e lëshoi karrigen.
Bisedat për legjitimitet dhe kërkesat për zgjedhje të parakohshme janë vetëm për në shtëpi, për t’i mbajtur të njëjtët politikanë në kondicion dhe për t’u shitur shpresë se së shpejti do të kthehen në pushtet për të vjedhur përsëri. Por këto përralla nuk kalojnë më as në Reçicë të Vogël.
BDI-ja e di shumë mirë se më pak se një vit më parë, shqiptarët me votë i larguan nga të gjitha komunat me shumicë shqiptare dhe se çdo përballje e re me qytetarët do të thotë një tjetër shuplakë për ta. Në zgjedhjet e ardhshme, qytetarët do ta përfundojnë punën dhe kjo udhëheqje e pareformuar e cila funksionon si një politbyro, do ta dërgojnë direkt në pension politik.
Lajme nga vendi
Mickoski për vendimin e Abazit: 14 persona u dogjën të gjallë në spitalin modular në Tetovë, ndërsa Prokuroria nuk konstatoi përgjegjësi, rasti nuk ka përfunduar, gjithmonë mund të dalin detaje të reja
Kryetari i Qeverisë, Hristijan Mickoski, sot, duke iu përgjigjur pyetjes gazetareske se si e komenton vendimin e Prokurorisë Publike për Ndjekjen e Krimit të Organizuar, të udhëhequr nga Islam Abazi, për ta ndalur procedurën lidhur me ndërtimin dhe vendosjen e spitaleve modulare, pa ndjekje penale ndaj asnjë personi juridik apo fizik, theksoi:
„Opinioni duhet ta dijë se ky është një proces që zgjat tashmë 5 vjet. Proces i cili gjatë këtyre 5 viteve ka mobilizuar rreth vetes informacione të ndryshme. Por, ajo që është gjithashtu e rëndësishme të theksohet është se në spitalin modular në Tetovë u dogjën të gjallë 14 persona. Do ta përsëris, u dogjën të gjallë 14 persona në spitalin modular në Tetovë.
Për fat të keq, prokurori i cili tashmë është në largim – pasi, sipas informacioneve që kam, është shpallur konkurs për zgjedhjen e një prokurori të ri në Prokurorinë Themelore Publike për Ndjekjen e Krimit të Organizuar – supozoj se vendosi t’i përmbushë deri në fund detyrimet e tij ndaj qeverisë së mëparshme dhe nuk i bën përshtypje fakti që 14 persona u dogjën të gjallë. Do ta përsëris, u dogjën të gjallë 14 persona, kjo nuk do të thotë asgjë për të dhe vendos ta ndalë këtë proces.
Por, dua që opinioni ta dijë se kjo nuk është amnisti politike nga ana e këtij prokurori ndaj ish-urdhërdhënësve të tij, sepse gjithmonë mund të dalin detaje të reja që lidhen me këtë proces dhe gjithmonë ky proces mund të bëhet sërish aktual dhe të niset nga fillimi.
Kështu që, shumë herë i kam komentuar ato vendime në kuadër të sistemit tonë gjyqësor dhe për fat të keq një nga ato vendime skandaloze është edhe ky. Ajo që më huton mua dhe që vjen si mesazh nga opozita, është se deri dje ata që kritikonin për qasjen e organeve të drejtësisë, tani i lavdërojnë dhe janë plot lëvdata për punën e tyre dhe të ashtuquajturin objektivitet. Por, do ta përsëris, ky prokuror dhe njerëzit që e kanë udhëhequr këtë rast nuk gjetën prova për kryerjen e një vepre penale në një rast në të cilin njerëzit digjeshin të gjallë.“
Vandalizohen pajisjet e shënjimit dimëror në Kodrën e Diellit, reagon Ambasada e Austrisë
VLEN: BDI-ja e ka humbur betejën me shqiptarët, zgjedhjet do ta vulosin fundin
Mickoski për vendimin e Abazit: 14 persona u dogjën të gjallë në spitalin modular në Tetovë, ndërsa Prokuroria nuk konstatoi përgjegjësi, rasti nuk ka përfunduar, gjithmonë mund të dalin detaje të reja
Zyra e Avokatit të Popullit në Tetovë sot do të jetë e hapur
Nesër në Maqedoni do të shpallet gjendje krize në energjetikë, nga 1 shtatori hyjnë në fuqi masat për kursim
Kovaçevski paralajmëroi drejtor të ri të Drejtorisë për Zbatimin e Sanksioneve
Azizi zbulon dyfytyrësinë e Ali Ahmetit: Ja vazali që e mbronte Gruevskin
Visar Ganiu ua uron Kurban Bajramin: Ju uroj që kjo festë e shenjtë t’ju sjellë paqe në zemër | VIDEO
Aksident tragjik në autostradën Tetovë – Gostivar, humb jetën një grua 33 vjeçare | VIDEO
-
Lajme nga vendi3 weeks agoDyvjeçar nga Kumanova helmohet me tretës ngjyre, dërgohet në Klinikën “Nëna Terezë”
-
Lajme nga vendi2 months agoZv/kryeministri Bekim Sali: Suedia mbetet mbështetëse e fuqishme e perspektivës sonë evropiane
-
Lajme nga vendi1 month agoKronika e zezë – Tetovë dhe Gostivar, 08 Korrik