Lajme nga vendi
Kronika e zezë – Tetovë dhe Gostivar, 18 Nëntor
Dje në Stacionin Policor Tearcë, është privuar nga liria një 40-vjeçar nga fshati Përshevcë, rajoni i Tetovës. Ai ishte thirrur në orën 11:45 në stacionin policor për shkak të një kundërvajtjeje të kryer më parë, përkatësisht sepse nuk kishte ndaluar me automjetin e udhëtarëve në shenjën e dhënë për ndalim nga zyrtarët policorë. Gjatë bisedës zyrtare u konstatua se automjetin e udhëtarëve „Folksvagen Bora“ me targa të Tetovës e kishte drejtuar pa dhënë provimin e shoferit. Pas dokumentimit të plotë të rastit, do të pasojë parashtresë përkatëse.
……Dje në orën 16:05 në SPB Tetovë, një 63-vjeçar nga Tetova ka paraqitur se në periudhën nga 17.11.2026 nga ora 23:00 deri në orën 10:00 më 18.11.2026 në rr. „Nikolla Parapunov“ në murin e jashtëm të shtëpisë së tij ishte shkruar një grafit. Një ekip nga DPB Gostivar ka kryer këqyrje në vendngjarje dhe po merren masa për zbardhjen e rastit.
……Djenë orën 19:30 në rr. „101“ në Gostivar, zyrtarë policorë nga DPB Gostivar e kanë privuar nga liria një 27-vjeçar nga Gostivari, sepse gjatë kontrollit të kryer mbi të i janë gjetur dhe sekuestruar marihuanë dhe thikë. Ai është mbajtur në stacion policor dhe pas dokumentimit të plotë të rastit, kundër tij do të ngrihen kallëzime përkatëse.
……Dje në orën 22:45 në DPB Gostivar, një 44-vjeçar nga fshati Banjicë e Poshtme, rajoni i Gostivarit, ka paraqitur se rreth orës 21:10 para një objekti hotelerik në fshat, pas keqkuptimeve të mëparshme të ndërsjella, është sulmuar fizikisht nga fqinji i tij, me ç’rast ka goditur xhamin e vitrinës së objektit dhe e ka dëmtuar atë. Po merren masa për zbardhjen dhe dokumentimin e plotë të rastit.
……Dje në orën 22:40 në SPB Tetovë, një 30-vjeçar nga Tetova ka paraqitur se më 17.11.2026 rreth orës 23:00 në Sheshin e Qytetit në Tetovë është sulmuar fizikisht nga dy persona nga fshati Poroj, rajoni i Tetovës. Po merren masa për zbardhjen dhe dokumentimin e rastit.
…….Zyra e Jashtme për Punë Kriminalistike Gostivar ka ngritur kallëzim penal kundër një 35-vjeçari nga fshati Çegran, rajoni i Gostivarit, për shkak të ekzistimit të bazave të dyshimit për vepër penale të kryer „vrasje në tentativë“. Më 15.11.2026 në oborrin në fshatin Çegran, pas një fjalosjeje të mëparshme dhe përleshjeje fizike, i denoncuari me mjet të mprehtë i ka shkaktuar plagë shpuese një personi.
Lajme nga vendi
“SAFE CITY” FITON ÇMIM NDËRKOMBËTAR NË DUBAI!
Në ceremoninë zyrtare të ndarjes së çmimeve „World Police Summit Awards 2026“, të mbajtur në kuadër të Samitit Botëror të Policisë në Dubai, në Emiratet e Bashkuara Arabe, ministrit të Punëve të Brendshme, Pançe Toshkovski, iu dorëzua çmimi prestigjioz ndërkombëtar „Excellence in Road Safety“.
Maqedonia e fitoi këtë çmim për projektin „Qyteti i Sigurt“, si mirënjohje për reformat që Ministria e Punëve të Brendshme po i zbaton në fushën e sigurisë në komunikacion.
Projekti paraqet një qasje sistematike për avancimin e sigurisë në trafik, duke ndërthurur teknologjitë moderne, ndryshimet ligjore, zbulimin automatik të kundërvajtjeve dhe digjitalizimin e procedurave.
Në kuadër të Samitit Botëror të Policisë, ministri Toshkovski pati mundësinë t’u drejtohet përfaqësuesve të policive dhe pjesëmarrësve nga vende të ndryshme, gjatë fjalimeve hyrëse të samitit.
Si shembull konkret të bashkëpunimit të suksesshëm ndërkombëtar, Toshkovski përmendi hetimin e përbashkët të policisë së Maqedonisë dhe FBI-së amerikane kundër platformës ilegale online OLVX, e cila lidhet me tregtinë e të dhënave personale të vjedhura dhe mjeteve për krim kibernetik.
Ai theksoi se aktivitetet e ndërmarra në Maqedoni kanë kontribuar në sigurinë digjitale të qytetarëve në Shtetet e Bashkuara të Amerikës.
Dorëzimi i këtij çmimi përbën një vlerësim ndërkombëtar për angazhimin e policisë së Maqedonisë në avancimin e sigurisë në komunikacion, por edhe një obligim shtesë për vazhdimin e reformave, modernizimin dhe zbatimin e zgjidhjeve bashkëkohore në shërbim të qytetarëve.
Lajme nga vendi
Çmimi i arit bie në nivelin më të ulët që nga shtatori i vitit 2025
Çmimi i arit vazhdon të shënojë rënie dhe të mërkurën arriti nivelin më të ulët që nga shtatori i vitit 2025, pasi investitorët reaguan ndaj pritjeve për një rritje të mundshme të normave të interesit në SHBA, përcjell TV21. Në tregjet botërore, ari u zhvlerësua për rreth 3.2 për qind, duke zbritur në 3.726 dollarë për ons, ndërsa gjatë ditës preku edhe nivelin prej 3.720 dollarësh.
Shkaku kryesor i rënies janë pritjet se Banka Qendrore Amerikane (FED) mund të vazhdojë rritjen e normave të interesit për të frenuar inflacionin. Kjo e bën arin më pak tërheqës për investitorët, pasi ai nuk sjell fitim nga interesat. Presion shtesë mbi çmimin ka ushtruar edhe forcimi i dollarit amerikan, i cili ka arritur nivelin më të lartë në 19 muajt e fundit. Kjo e bën arin më të shtrenjtë për blerësit që përdorin valuta të tjera.
Rënia ka përfshirë edhe metalet e tjera të çmuara. Argjendi është zhvlerësuar për rreth 5 për qind, në 45.03 dollarë për ons, ndërsa rënie kanë shënuar edhe platini dhe paladiumi. Analistët vlerësojnë se lëvizja e mëtejshme e çmimeve do të varet kryesisht nga vendimet e FED-it dhe sinjalet për politikën monetare në periudhën e ardhshme.
Lajme nga vendi
Petrova për integrimin e Maqedonisë: Marrëdhëniet e fqinjësisë së mirë janë pjesë e kushteve për integrimin në BE
Ministrja e Punëve të Jashtme e Bullgarisë, Velisllava Petrova thotë se për të gjitha vendet që janë kandidate për përfshirje në Bashkimin Evropian, marrëdhëniet e fqinjësisë së mirë janë pjesë e kushteve për anëtarësim.
“Bullgaria nuk ka pasur kurrë një qëndrim për atë se cilin vend do të mbështeste. Ka kushte dhe ato janë të deklaruara qartë. Për të gjitha vendet që janë kandidate për përfshirje në Bashkimin Evropian, marrëdhëniet e fqinjësisë së mirë janë pjesë e këtyre kushteve. Ky do të jetë një fakt dhe një qëndrim që ne do ta mbrojmë, pavarësisht nga qeveria në Serbi apo në Republikën e Maqedonisë së Veriut”, tha në një konferencë për shtyp ministrja e Punëve të Jashtme e Bullgarisë, Velisllava Petrova, në përgjigje të pyetjes nëse Bullgaria do ta mbështesë pa kushte Serbinë në rrugën e saj evropiane dhe cili është qëndrimi i kolegëve të saj evropianë kur diskutojnë me ta integrimin evropian të Maqedonisë së Veriut.
Petrova theksoi se çështja e Maqedonisë po ngrihet gjithnjë e më pak nga kolegët e saj evropianë, që do të thotë se, siç thotë ajo, qëndrimi i Bullgarisë është i qartë dhe i kuptuar nga kolegët e saj.
Sipas fjalëve të saj, do të ishte një mundësi e humbur për Maqedoninë nëse nuk e përdor këtë “puls për zgjerim dhe zhvillim”, i cili është i dukshëm në vende si Mali i Zi, Shqipëria, Moldavia dhe madje edhe Ukraina, për të hapur më shumë kapituj të negociatave dhe për të ecur përpara në rrugën drejt anëtarësimit.
“Shpresoj që në Republikën e Maqedonisë së Veriut do të gjendet vullneti politik që kjo të ndodhë”, tha Petrova./Telegrafi/

