Lajme nga vendi
LAMM apelon për vozitje të kujdesshme në rrugët e lagështa, rrezik nga rrëshqitjet e dheut
Lajme nga vendi
Çmimi i arit bie në nivelin më të ulët që nga shtatori i vitit 2025
Çmimi i arit vazhdon të shënojë rënie dhe të mërkurën arriti nivelin më të ulët që nga shtatori i vitit 2025, pasi investitorët reaguan ndaj pritjeve për një rritje të mundshme të normave të interesit në SHBA, përcjell TV21. Në tregjet botërore, ari u zhvlerësua për rreth 3.2 për qind, duke zbritur në 3.726 dollarë për ons, ndërsa gjatë ditës preku edhe nivelin prej 3.720 dollarësh.
Shkaku kryesor i rënies janë pritjet se Banka Qendrore Amerikane (FED) mund të vazhdojë rritjen e normave të interesit për të frenuar inflacionin. Kjo e bën arin më pak tërheqës për investitorët, pasi ai nuk sjell fitim nga interesat. Presion shtesë mbi çmimin ka ushtruar edhe forcimi i dollarit amerikan, i cili ka arritur nivelin më të lartë në 19 muajt e fundit. Kjo e bën arin më të shtrenjtë për blerësit që përdorin valuta të tjera.
Rënia ka përfshirë edhe metalet e tjera të çmuara. Argjendi është zhvlerësuar për rreth 5 për qind, në 45.03 dollarë për ons, ndërsa rënie kanë shënuar edhe platini dhe paladiumi. Analistët vlerësojnë se lëvizja e mëtejshme e çmimeve do të varet kryesisht nga vendimet e FED-it dhe sinjalet për politikën monetare në periudhën e ardhshme.
Lajme nga vendi
Petrova për integrimin e Maqedonisë: Marrëdhëniet e fqinjësisë së mirë janë pjesë e kushteve për integrimin në BE
Ministrja e Punëve të Jashtme e Bullgarisë, Velisllava Petrova thotë se për të gjitha vendet që janë kandidate për përfshirje në Bashkimin Evropian, marrëdhëniet e fqinjësisë së mirë janë pjesë e kushteve për anëtarësim.
“Bullgaria nuk ka pasur kurrë një qëndrim për atë se cilin vend do të mbështeste. Ka kushte dhe ato janë të deklaruara qartë. Për të gjitha vendet që janë kandidate për përfshirje në Bashkimin Evropian, marrëdhëniet e fqinjësisë së mirë janë pjesë e këtyre kushteve. Ky do të jetë një fakt dhe një qëndrim që ne do ta mbrojmë, pavarësisht nga qeveria në Serbi apo në Republikën e Maqedonisë së Veriut”, tha në një konferencë për shtyp ministrja e Punëve të Jashtme e Bullgarisë, Velisllava Petrova, në përgjigje të pyetjes nëse Bullgaria do ta mbështesë pa kushte Serbinë në rrugën e saj evropiane dhe cili është qëndrimi i kolegëve të saj evropianë kur diskutojnë me ta integrimin evropian të Maqedonisë së Veriut.
Petrova theksoi se çështja e Maqedonisë po ngrihet gjithnjë e më pak nga kolegët e saj evropianë, që do të thotë se, siç thotë ajo, qëndrimi i Bullgarisë është i qartë dhe i kuptuar nga kolegët e saj.
Sipas fjalëve të saj, do të ishte një mundësi e humbur për Maqedoninë nëse nuk e përdor këtë “puls për zgjerim dhe zhvillim”, i cili është i dukshëm në vende si Mali i Zi, Shqipëria, Moldavia dhe madje edhe Ukraina, për të hapur më shumë kapituj të negociatave dhe për të ecur përpara në rrugën drejt anëtarësimit.
“Shpresoj që në Republikën e Maqedonisë së Veriut do të gjendet vullneti politik që kjo të ndodhë”, tha Petrova./Telegrafi/
Lajme nga vendi
Gjermania përgjysmon kuotën për punëtorët nga Maqedonia dhe Ballkani Perëndimor!
Gjermania po planifikon të përgjysmojë numrin e punëtorëve që mund të pranohen çdo vit nga Maqedonia e Veriut dhe vendet e tjera të Ballkanit Perëndimor, duke e ulur kuotën nga 50.000 në 25.000 persona.
Qeveria gjermane ka miratuar propozimin, i cili pritet të votohet më 18 dhjetor në Bundesrat, dhomën që përfaqëson 16 landet gjermane. Nëse miratohet, qytetarët e Maqedonisë dhe rajonit do të kenë më pak mundësi për të siguruar punësim në Gjermani përmes kësaj skeme.
Vendimi ka shkaktuar reagime te punëdhënësit gjermanë, veçanërisht në sektorin e ndërtimtarisë, i cili paralajmëron mungesë të madhe të fuqisë punëtore. Sipas përfaqësuesve të industrisë, vetëm nga ky sektor mund të mungojnë rreth 9.000 punëtorë si pasojë e kufizimit.
Të dhënat tregojnë se rreth 35 për qind e vizave të lëshuara përmes Rregullores për Ballkanin Perëndimor janë për punësim në ndërtimtari. Përfaqësuesit e sektorit kërkojnë heqjen e kuotës dhe përshpejtimin e procedurave për viza.
Kufizimi është pjesë e politikës më të ashpër migratore të qeverisë së kancelarit Friedrich Merz. Pasojat mund t’i ndiejnë drejtpërdrejt edhe qytetarët e Maqedonisë së Veriut që synojnë të punojnë në Gjermani, si dhe familjet e tyre që varen nga të ardhurat dhe dërgesat nga diaspora.
Nëse masa miratohet, mundësitë për punësim në Gjermani përmes kësaj skeme do të përgjysmohen.

