Specialistët për Hetimin e Krimeve në Komisariatin e Policisë Elbasan kanë arrestuar në flagrancë shtetasin E. B., 30 vjeç, i dyshuar për një akt dhune të ndodhur në lagjen “5 Maj”.

Sipas informacioneve zyrtare, 30-vjeçari ka goditur me mjet prerës shtetasin E. G., i cili ushtron detyrën si infermier në Institutin e Mjekësisë Ligjore. Ngjarja dyshohet të ketë ndodhur për shkak të detyrës së viktimës.

Si pasojë e sulmit, infermieri ka pësuar dëmtime të lehta dhe ka marrë ndihmën e nevojshme mjekësore, ndërsa ndodhet jashtë rrezikut për jetën.

Policia ka ndërhyrë pas njoftimit dhe ka bërë të mundur kapjen dhe arrestimin e autorit të dyshuar, ndërkohë që vijojnë hetimet për të zbardhur plotësisht rrethanat dhe motivet e ngjarjes.

Materialet procedurale i janë referuar Prokurorisë pranë Gjykatës së Shkallës së Parë me Juridiksion të Përgjithshëm Elbasan, për vijimin e veprimeve ligjore.

Advertisement

“Specialistët për Hetimin e Krimeve të Komisariatit të Policisë Elbasan arrestuan në flagrancë shtetasin E. B., 30 vjeç, pasi në lagjen “5 Maj” ka goditur me mjet prerës, për shkak të detyrës, shtetasin E. G., infermier në Institutin e Mjekësisë Ligjore, i cili është dëmtuar lehtë”, tha policia.

Ajo shtoi se materialet procedurale iu referuan Prokurorisë pranë Gjykatës së Shkallës së Parë me Juridiksion të Përgjithshëm Elbasan, për veprime të mëtejshme.

Vitet e fundit Morgu i Spitalit të Elbasanit, është vënë vazhdimisht nën akuzë se është kthyer në qendër biznesi. Punonjësit e këtij morgu, janë denoncuar se bëjnë pazare kundrejt pagesash, me familjarë apo të afërmit e viktimave që vdesin në spital apo në aksidente, por dhe për ata njerëz që vdesin në mënyrë natyrale në shtëpitë e tyre. Në denoncimet ka pasur dhe raste kur një natë në këtë morg paguhet 30 mijë lekë të reja.

Në një tjetër denoncim, një qytetar nga Elbasani u ankua se për tërheqjen nga morgu i këtij spitali të një të afërmi të tij i cili kishte ndërruar jetë i kishin kërkuar 500 mijë lekë të vjetra.

Advertisement

Zbulimi i eshtrave njerëzore brenda një valixheje në një liqen artificial në zonën turistike të Sithonias, në Halkidiki, ka vënë në lëvizje autoritetet greke dhe ka ngritur dyshime për një ngjarje të rëndë kriminale.

Eshtrat u gjetën më 3 mars gjatë punimeve për pastrimin e zonës në ambientet e një kompleksi hotelier. Fillimisht dyshohej se ato i përkisnin një personi, por analizat mjeko-ligjore kanë konfirmuar se bëhet fjalë për mbetjet e dy individëve të ndryshëm.

Sipas burimeve hetimore, viktimat janë të moshave të ndryshme dhe dyshohet se kanë qëndruar për një kohë të gjatë në vendin ku u zbuluan. Një nga viktimat mendohet paraprakisht të jetë grua, ndërsa identiteti i tyre ende nuk është përcaktuar.

Autoritetet greke vijojnë hetimet për të zbardhur rrethanat e ngjarjes dhe për të identifikuar viktimat.

Stuhia e fortë që goditi Zagreb gjatë natës dhe në orët e mëngjesit shkaktoi kaos në të gjithë qytetin: era rrëzoi pemë, shqeu pjesë të çative, përmbysi semaforë dhe paralizoi trafikun e tramvajit dhe hekurudhave, ndërsa zjarrfikësit u përballën me një numër të madh thirrjesh nga qytetarët.

Në disa zona, uji depërtoi në ndërtesa banimi, ndërsa dëme janë raportuar edhe në disa nga objektet më të njohura të qytetit.

Sipas informacioneve nga terreni, shpejtësia e erës arriti deri në 120 km/h, ndërsa pasojat janë të dukshme pothuajse në të gjitha pjesët e kryeqytetit kroat.

Qytetarët morën paralajmërime përmes sistemit të alarmit në telefonat mobil, ndërsa autoritetet vendore pezulluan mësimin në shkollat fillore dhe të mesme në Zagreb dhe në rajonin përreth, për shkak të kushteve të rrezikshme atmosferike.

Në të njëjtën kohë, në zonat më të larta të qytetit dhe rrethinës, situata mori pamje dimërore. Në malin Sljeme shpërtheu një stuhi e fuqishme dëbore.

Advertisement

Disa banorë mbetën të izoluar, pa energji elektrike, ngrohje dhe kushte bazë për jetesë, ndërsa priten ndërhyrje nga zjarrfikësit, shërbimet dimërore dhe kompania e shpërndarjes së energjisë elektrike. Reshje dëbore u regjistruan edhe në zona të tjera përreth Zagrebit.

Autoritetet u bëjnë thirrje qytetarëve për kujdes maksimal dhe durim, duke rekomanduar që të shmangin daljet e panevojshme deri në përmirësimin e kushteve të motit. Sipas meteorologëve, era e fortë pritet të vazhdojë gjatë gjithë ditës dhe stabilizimi i plotë i motit nuk pritet menjëherë.